APM ၊ ဧပြီ ၂၁ / ၂၀၂၃
နီရပ်ပြန် ရက္ခိုင်စစ်ဖီးယှောင်များကို စစ်ကောင်စီကထောက်ပံ့မည်ဟု ကတိပီးထားသည့် ဆန်ရိက္ခာနှစ်လစာအား လက်ဟိ အချိန်ထိ လုံးဝ ထုတ်ပီးခြင်းမဟိသိမ့်ဟုဆို နီရပ်ပြန် ရက္ခိုင်စစ်ဖီးယှောင်များက ပြောသည်။
စစ်ကောင်စီသည် ကုန်ခသည့် မာ့ချ်လက မြောက်ဦး၊ ကျောက်တော်နန့် ပုဏ္ဏာကျွန်း မြို့နယ်ဟိ စစ်ဖီးယှောင် တချို့ကို ငွေကျပ်ခြောက်သိန်းနန့်ဆန်နှစ်လစာထောက်ပံ့ပီးမည်ဟုဆိုကာ နီရပ်သို့ အတင်းအဓမ္မပြန်ပို့ထားခြင်း ဖြစ်သည်။
ယေကေလေ့ ယင်းစစ်ကောင်စီ ထောက်ပံ့မည်ဆိုသည့် ဆန် နှစ်လစာမှာ လက်ဟိအချိန်ထိ လုံးဝမရသည့်အပြင် ငွေကျပ် ခြောက်သိန်းကိုပင် မရသိမ့်သည့် မိသားစုများ ဟိနီသိမ့်ကြောင်း စစ်ဖီးယှောင်များ ကပြောသည်။
ယင်းအပြင် စစ်ကောင်စီသည် ယင်းစစ်ဖီးယှောင်များ နီရပ်မပြန်ခင်က ရပ်ရွာအနီးအနားးတွင် မိုင်းယှင်းလင်းပီး မည်ဟု ကတိပြုပြောဆိုမှုများဟိခပြီး လက်တွိမှာတော့ မိုင်းယှင်းလင်းပီးခြင်းလေ့ မဟိသိမ့်ဟု ဆိုသည်။
စစ်ကောင်စီသည်ကုန်ခသည့် မာ့ချ်လကစ၍ ရက္ခိုင်ပြည်မြို့နယ်အသီးသီးဟိ စစ်ဖီးယှောင်စခန်းများမှ စစ်ဖီးယှောင် များကို နီရပ်ပြန်ရန် ဖိအားပီးနီခပြီး ယင်းသို့ စစ်ကောင်စီဖိအားပီးမှုကြောင့် မြောက်ဦး၊ ကျောက်တော်နန့် ပုဏ္ဏာကျွန်းမြို့နယ် ဟိစစ် ဖီးယှောင်ဦးရေ ၃၀၀၀ ကျော်နီရပ်ပြန်လားခရသည်။
ယင်းသို့ နီရပ်ပြန်လားခကတ်သည် စစ်ဖီးယှောင်များသည် ရပ်ရွာအတွင်း၌ကျန်ခသခည့် ၎င်းရို့ပိုင် နီအိမ်များ၊ လယ်ထွန် စက်များ၊ ကျွဲ၊ နွား၊ ဆိတ်၊ ကြက်၊ ဝက် စသည့်ရို့ ပျက်စီး၊ပျောက်ဆုံးလား၍ လုပ်ကိုင်စားသောက်ရီး အရင်းအနှီး များလို အပ်နီသည့်အပြင် စားဝတ်နီရီးလေ့ အခက်အခဲဖြစ်နီကတ်ရကြောင်း သိဟိရပါသည်။
