APM၊ နိုဗမ်ဘာ ၂၁ / ၂၀၂၃
ဂါဇာအလယ်ပိုင်း Al-Bureij ဒုက္ခသည်စခန်းဟိ ကုလသမဂ္ဂ ကယ်ဆယ်ရီးနန့် အလုပ်အဖွဲ့ (UNRWA) ပိုင် စာသင်ကျောင်းတကျောင်းကို နိုဗမ်ဘာ ၂၀ ရက်နိမာ အစ္စရေးက လီကြောင်းတိုက်ခိုက်မှုကြောင့် အနည်းဆုံး လူ ၁၂ ယောက်သီဆုံးပြီးကေ ဒါဇင်နန့်ချီဒဏ်ရာရဟိလားကြောင်း သိရပါရေ။
လီကြောင်းတိုက်ခိုက်မှုကြောင့် ရွိပြောင်းနီထိုင်သူ ထောင်ချီ ခိုလှုံနီရေ အဆိုပါ စာသင်ကျောင်းမာ အမျိုးသမီးတိနန့် အချေတိအပါအဝင် ပါလက်စတိုင်း ၁၂ ယောက်သီဆုံးခပြီးကေ လူပေါင်း ဒါဇင်နန်ချီ ဒဏ်ရာရလားရေလို့ ဂါဇာဟိ ပါလက်စတိုင်းကျန်းမာရီးဝန်ကြီးဌာနက ဆိုပါရေ။
UNRWA ၏ အဆောက်အအုံအားလုံးစွာ အစ္စရေးနန့်ညှိနှိုင်းပနာ ကုလသမဂ္ဂအလံတိကို လွှင့်ထူထားကေလေ့ အစ္စရေးစစ်တပ်စွာ ဂါဇာဟိUNRWA စာသင်ကျောင်းတိကို ဆက်လက်တိုက်ခိုက်နီကြောင်း UNRWA ၏မီဒီယာအကြံပီး Adnan Abu Hasna က ပြောပါရေ။
ယင်းအပြင် ဟားမတ်စ်-အစ္စရေး ပဋိပက္ခစရေခါကပင် ဂါဇာဟိ ကုလသမဂ္ဂအဖွဲ့အစည်းတိနန့် စာသင်ကျောင်း ၇၀ ကျော်စွာ အစ္စရေး၏ တိုက်ခိုက်မှုမာ ပစ်မှတ်ထားခံနီရရေပိုင် တချိန်တည်းမာ ကုလသမဂ္ဂ ဝန်ထမ်း ၁၀၄ ယောက်သီဆုံးခရပါသိမ့်ရေ။
လက်ဟိအချိန်အထိ အစ္စရေး၏ လီကြောင်းတိုက်ခိုက်မှုကြောင့် ဂါဇာမာ အမျိုးသမီးတိနန့် အချေ ၉၀၀၀ ကျော် အပါအဝင် ပါလက်စတိုင်း ၁၃၀၀၀ ထက်မနည်းသီဆုံးခပြီးကေ ၃ သောင်းကျော် ဒဏ်ရာရဟိခပါရေ။
Source – 12 Palestinians killed in Israeli attack on UN
Photo – Al Jazeera
