APM၊ အောက်တိုဘာ ၂၁/၂၀၂၃
အောက်တိုဘာ ၂၀ ရက်နိညည့်က စစ်တွေမြို့အဝင် ကျောက်တန်း မြန်မာစစ်တပ် စစ်ဆီးရီးဂိတ်မာ စစ်ဆီးမှုကြန့်ကြာနီလို့ ကိုယ်ဝန်ဆောင်အမျိုးသမီးတယောက် ဆီးရုံသို့ အချိန်မီမရောက်နိုင်ခဘဲ လမ်းမာသီဆုံးလားကြောင်း သိရပါရေ။
သီဆုံးလားသူကိုယ်ဝန်ဆောင် အမျိုးသမီးမာ စစ်တွေမြို့နယ် ကြွီတဲပိုက်ဆိပ်ကြီးရွာက အသက် ၂၉ နှစ်အရွယ် မအဖြူလုံး( ခေါ်) ခင်ခင်လင်း ဖြစ်ပါရေ။
မအဖြူလုံးစွာ ကိုယ်ဝန် ၈ လကျော်ဟိနီယာဖြစ်ပြီးကေ အောက်တိုဘာ ၂၀ ရက်နိညည့် ၁၀ နာရီလောက်က ရင်မွန်းလာလို့ တုတ်တုတ်ချေတစီးနန့် စစ်တွေဆီးရုံသို့ အရေးပေါ် ပို့ဆောင်စွာမာ မြန်မာစစ်တပ်ကျောက်တန်းစစ်ဆီးရီးဂိတ်က လားခွင့် မပြုဘဲ ၁ နာရီလောက် အချိန်ယူစစ်ဆီးခရေလို့ မိသားစုဝင်တိက ပြောပါရေ။
စစ်ဆီးဂိတ်တာဝန်ဟိလူတိကို ကိုယ်ဝန်ဆောင်နန့် အရေးပေါ် ဆီးရုံကိုလားစွာလို့အကျိုးအကြောင်းပြောပြကေလေ့ အထက်ခွင့်ပြုချက်မကျသိမ့်ဆိုပနာ လားခွင်မပီးခလို့ ဆိုပါရေ။
ယင်းပိုင်စစ်ဆီးခံခရလို့ မအဖြူလုံးမာ ဆီးရုံသို့အချိန်မီ မရောက်နိုင်ခဘဲ လမ်းမာပင် သီဆုံးလားခရပြီးကေ ဆီးရုံသို့အရောက်မာ ရုပ်အလောင်းကို ခွဲစိပ်ပနာ အချေကိုကယ်ဖို့ကြိုးစားခကတ်ကေလေ့ အချိန်မမီနိုင်ခလို့ သိရပါရေ။
အချေရုပ်အလောင်းကိုတော့ ဒေနိမိုးထက စစ်တွေမြို့၊ အာကျိတ်တော်ကုန်းသင်္ချိုင်းမာ မြီမြှုပ် သင်္ဂြိုလ်လိုက်ပြီးကေ မအဖြူလုံး ရုပ်အလောင်းကိုတော့ ကြွီတဲပိုက်ဆိပ်ကြီးရွာသို့ ယူဆောင်လားပနာ အောက်တိုဘာ ၂၂ ရက်နိ ရွာသင်္ချိုင်းမာ သင်္ဂြိုလ်လားဖို့လို့ သိရပါရေ။
Photo – ရွှီရောင်မိတ္တာဖောင်ဒေသျှင်း
