APM ၊ စက်တမ်ဘာ ၂၀ / ၂၀၂၃
မြောက်ဦးမြို့၊ ဘုရားပေါ် စစ်ဖီးယှောင်စခန်းမာ စားနပ်ရိက္ခာတိနန့် မီးဖိုချောင်သုံးပစ္စည်းတိအရေးတကြီး လိုအပ်နီရေလို့ သိရပါရေ။
ယင်းစစ်ဖီးယှောင်စခန်းမာ ကုန်ခသည့် ၂၀၁၈-၂၀၁၉ ခုနှစ်တိုက်ပွဲကာလက ရက္ခိုင့်တပ်တော် AA နန့် မြန်မာစစ်တပ်ရို့ တိုက်ပွဲတိပြင်းထန်ချိန်ကစလို့ မြောက်ဦးမြို့နယ် ဘောင်းတပ်၊ အုတ်ဖိုကန်၊ ချောင်းသစ်၊ ပေါက်တောပြင်စရေကျေးရွာတိနန့် ကျောက်တော်မြို့နယ် အောင်သာယာ၊ အလယ်ကျွန်း၊ အခစား စရေကျေးရွာတိမှ ဒေသခံတိလာရောက် ခိုလှုံနီ ထိုင်နီကတ်စွာဖြစ်ပါရေ။
လက်ဟိ ယင်းစစ်ဖီးယှောင်စခန်းမာ စားနပ်ရိက္ခာတိနန့် အခြီခံစားသောက်ကုန်ပစ္စည်းတိပြတ်လပ်နီလို့ စစ်ဖီးယှောင်တိ အခက်အခဲဖြစ်နီကတ်ရရေလို့ စခန်းတာဝန်ခံက ဆိုပါရေ။
ယင်းစစ်ဖီးယှောင်စခန်းကို ကုန်ခရေ သြဂတ်စ်လမာ WFP မှ လူတယောက်ကို တလ ၃၀၀၀၀ ကျပ်စီ ထောက်ပံ့ပီးခကေလေ့ လက်တလော ကုန်ဈီးနှုန်းမြင့်တက်နီစွာနန့် အဆင်မပြေလို့ ဆိုပါရေ။
ယင်းအပြင် အဆိုပါဘုရားပေါ် စစ်ဖီးယှောင်စခန်းဟိ စစ်ဖီးယှောင်တိ အသုံးပြုနီကတ်တေ မီးဖိုချောင်သုံးပစ္စည်းတိလည်း ဟောင်းနွမ်းပျက်စီးနီလို့ မီးဖိုချောင်သုံးပစ္စည်းတိလည်း အရေးတကြီးလိုအပ်နီရေလို့ သိရပါရေ။
ဘုရားပေါ်စစ်ဖီးယှောင်စခန်းမာ အိမ်ထောင်စု ၇၀ စုနန့် လူဦးရေ ၂၄၈ ယောက် ခိုလှုံနီပြီးကေ ယင်းအထဲတွင် ကိုယ်လက်အင်္ဂါချို့ယွင်းသူ တချို့လည်းပါဝင်ရေလို့သိရပါရေ။
