
APM၊ မာ့ချ် ၂၀/၂၀၂၄
ရက္ခိုင်ပြည်၊ ရသေ့တောင်မြို့အခြီစိုက် အကြမ်းဖက်စစ်ကောင်စီတပ်၏ ခမရ (၅၃၆)၊ခမရ (၅၃၇)နန့် ခမရ(၅၃၈) တပ်ရင်းရို့ကို ရက္ခိုင့်တပ်တော်တိုက်ခိုက်သိမ်းပိုက်ချိန်က သိမ်းဆည်းရမိခရေ အကြမ်းဖက် စစ်ကောင်စီတပ်ဖွဲ့ဝင်တချို့၏အလောင်းတိနန့်ဘင်္ဂလီတချို့၏ ရုပ်အလောင်းမှတ်တမ်းဓာတ်ပုံတိကို ရက္ခိုင့်တပ်တော် AA က မာ့ချ်လ ၂၀ ရက်နိမာ ထုတ်ပြန်ပါရေ။
ရက္ခိုင့်တပ်တော်ထုတ်ပြန်ရေ မှတ်တမ်းဓာတ်ပုံ စုစုပေါင်း ၅ ပုံပါဝင်ပြီးကေ ယင်းဓာတ်ပုံတိထဲမာ စစ်ကောင်စီယူနီဖောင်းဝတ်ပနာ လက်နက်ကိုင်ဆောင်ယင်း ဒဏ်ရာတိနန့်သီဆုံးနီရေ ရုပ်အလောင်း ၇ လောင်းထက်မနည်းပါဝင်ပါရေ။
ရက္ခိုင့်တပ်တော်စွာ၂၀၂၄ ခုနှစ်၊ မာ့ချ်လ (၁၇) ရက်နိ၊ ညဇာ (၄) နာရီအချိန်လောက်က ရသေ့တောင်မြို့အခြီစိုက် “ခမရ (၅၃၆)၊ခမရ (၅၃၇) နန့် ခမရ(၅၃၈)” တပ်ရင်း (၃) ခုစလုံးကို အပြီးသတ်သိမ်းပိုက်ရယူခစွာဖြစ်ပါရေ။
ရန်သူစစ်ကောင်စီက ကြည်း၊ရီ၊လီ ပစ်ကူအမြောက်အမြားနန့် အပြင်းအထန်ခုခံနီရေကြားက ယင်းတပ်ရင်း (၃) ခုစလုံးကို နှစ်ပတ်လောက်ထိုးစစ်ဆင် တိုက်ခိုက်ခပြီးမှ သိမ်းပိုက်ရယူနိုင်ခရေလို့ ရက္ခိုင့်တပ်တော်က ဆိုပါရေ။
ယင်းတပ်ရင်းစခန်းတိက ရန်သူအင်အား နှစ်ရာလောက်စွာ စစ်သင်္ဘောတိနန့် ကိုယ်လွတ်ရုန်း ထွက်ဗြီးလားခပြီးကေ စစ်မှုထမ်းဥပဒေကို ခုတုံးလုပ်ပနာ စစ်ကောင်စီက လောလောလတ်လတ် စစ်သင်တန်းပီးထားရေ ဘင်္ဂလီ အလောင်းတချို့အပါအဝင်၊ စစ်ကောင်စီ၏ အလောင်းတိနန့် လက်နက်ခဲယမ်း၊ စစ်အသုံးအဆောင်ပစ္စည်းတိကိုလည်း သိမ်းဆည်းရမိခရေလို့ သိမ်းပိုက်တေနိ မာ့ချ် ၁၇ ရက်နိက ထုတ်ပြန်ခရေ ရက္ခိုင့်တပ်တော်၏ ထုတ်ပြန်ချက်ထဲမာ ဖော်ပြထားပါရေ။




