APM၊ နိုဗမ်ဘာ ၂၀/၂၀၂၃
တအာင်းပြည်နယ်၊ တပ်မဟာ(၂)စစ်ဒေသ၊ နမ့်ဆန်မြို့နယ်၊ မြို့သစ်ရွာကို နိုဗမ်ဘာ ၁၉ ရက်နိညည့် ၁ နာရီလောက်မာ တိုက်ပွဲဖြစ်ပွားစွာမဟိဘဲ စစ်ကောင်စီက ပေါင်(၅၀၀) ဗုံးနန့် လာရောက်ဗုံးကြဲတိုက်ခိုက်လို့ အချေ ၁ ယောက်အပါအဝင် ရွာသား ၂ယောက်သီဆုံးခပြီးကေ ၇ ယောက် ဒဏ်ရာရလားခကြောင်း တအာင်းတပ်မတော် (PSLF/TNLA) က ထုတ်ပြန်ပါရေ။
အဆိုပါဗုံးကြဲတိုက်ခိုက်မှုစွာ မြို့သစ်ကျေးရွာနီ တားဆန်းနော်ဆိုသူ နီအိမ်ထက်သို့ ဗုံးကျရောက်ပေါက်ကွဲခရေလို့ ဆိုပါရေ။
ယင်းကြောင့် အိမ်ထဲမာဟိနီရေ အိမ်ပိုင်သျှင် တားဆန်းနော်နန့် အချေတယောက်စွာ နီရာမာပင် ဂွင်တိုင်း သီဆုံးလားပြီးကေ အနားက ရွာသား ၇ ယောက် ထိခိုက်ဒဏ်ရာရလားခရေလို့ ဖော်ပြထားပါရေ။
ယင်းအပြင် ဗုံးကြဲတိုက်ခိုက်ခံရမှုအတွင်း လူနီအိမ် ၂ လုံး မီးလောင်ခပြီးကေ ၂၃ လုံး ပျက်ဆီးခပါရေ။
တအာင်းပြည်နယ်မာဖြစ်နီရေ တိုက်ပွဲတိအတွင်း စစ်ကောင်စီတပ်က လက်နက်ကြီးနန့် လီကြောင်း အသုံးပြုပနာ အရပ်သားပြည်သူတိနန့် လူနီအိမ်တိကို ပစ်မှတ်ထားတိုက်ခိုက်မှုတိကြောင့် အရပ်သား ၄၀ သီဆုံးခပြီး ၅၈ ယောက် ထိခိုက်ဒဏ်ရာရဟိခကြောင်း PSLF/TNLA ၏ ထုတ်ပြန်ချက်အရ သိဟိရပါရေ။
Photo – PSLF/TNLA
