APM ၊ အောက်တိုဘာ ၂၀ / ၂၀၂၃
မင်းပြားမြို့နယ်မာ ဒေနိ (အောက်တိုဘာ ၂၀ ရက်နိ) မိုးထက ၁ နှစ်ခွဲအရွယ်အချေတယောက်ရီမြုပ်သီဆုံးလားကြောင်း သိရပါရေ။
ရီမြုပ်သီဆုံးလားရေအချေမာ မင်းပြားမြို့နယ်၊ လက်တော်ရီရွာက ဦးအာဒူးလာမိန်၏သမီး မအင်ကာရာဘီ ဖြစ်ပါရေ။
မအင်ကာရာဘီစွာ ဒေနိ မိုးထ ၇ နာရီလောက်က အိမ်ရှိမာတယောက်တည်းကဇတ်နီစွာကနီ အိမ်နားကသုံးရီကန်သို့ ကျလားပနာ ရီမြုပ်သီဆုံးလားစွာလို့ ရွာသားတိကပြောပါရေ။
“ယင်းအချေစွာ ဒေနိမိုးထက အိမ်ရှိမာတယောက်တည်းကဇတ်နီရေ။ အဖလည်း ရက်ကျအလုပ်လုပ်နီစွာဖြစ်လို့ အိမ်မာမဟိ။ အမိလည်း အိမ်နောက်မာထမင်းချက်နီလို့ သတိမထားမိလိုက်စွာဟိဖို့။ ၈ နာရီလောက်ခါမှ အိမ်နားက သုံးရီကန်မာ ရီမြုပ်သီနီစွာကို ရီခပ်ဖို့လာရေ လူတိ တွိစွာပါ” လို့ ဆိုပါရေ။
မအင်ကာရာဘီ၏ ရုပ်အလောင်းကိုတော့ ဒေနိမိုးထ ၁၁ နာရီ ရွာဟိသင်္ချိုင်းမာ မြီမြုပ်သင်္ဂြိုလ်လားဖို့လို့ သိရပါရေ။
ရက္ခိုင်ပြည်မာ ကုန်ခရေ စပ်တမ်ဘာလကလည်း အကြောင်းအမျိုးမျိုးကြောင့် အချေ ၅ ယောက်အပါအဝင် လူ ၁၈ ယောက် ရီမြုပ်သီဆုံးခပါသိမ့်ရေ။
