APM ၊ ဂျူလိုင် ၂ / ၂၀၂၃
ညီနောင်မဟာမိတ်(၃)ဖွဲ့၏ထိန်းချုပ်နယ်မြီများနန့် လှုပ်ယှားနယ်မြီများအတွင်း၌ အကြမ်းဖက်တိုက်ဖျက်ရီးနန့် ရာဇဝတ်မှု ကျူးလွန်သည့် လုပ်ရပ်များ အား ချေမှုန်းရီးလုပ်ငန်းများကို ပိုမိုတိုးတက်ကောင်းမွန်ရန်အတွက် တက်တက်ကြွကြွနန့် အတူတကွပူးပေါင်းဆောင်ရွက် လားမည်ဖြစ်ကြောင်း MNTJP/MNDAA ၊ PSLF/TNLA၊ ULA/AA ညီနောင်မဟာမိတ်(၃) ဖွဲ့က ဂျူလိုင် ၁ ရက်နိတွင် ထုတ်ပြန်ကြေညာသည်။
ထုတ်ပြန်ချက်၌ ဒေသတည်ငြိမ်အီးချမ်းရီးနန့် ပြည်သူလူထုတရပ်လုံး၏ အသက်အိုးအိမ်စည်းစိမ်များကို ကာကွယ်စောင့် ယှောက်ရီးဟူသည့် မွန်မြတ်သောတာဝန်ဝတ္တရားကို ကျီပွန်စွာထမ်းဆောင်ရန်အတွက် မိမိရို့ ညီနောင်မဟာမိတ် (၃) ဖွဲ့ အနီ ဖြင့် မိမိရို့၏ ထိန်းချုပ်နယ်မြီများနန့် လှုပ်ယှားနယ်မြီများအတွင်း၌ အကြမ်းဖက်တိုက်ဖျက်ရီးနန့် ရာဇဝတ်မှုကျူးလွန်သည့် လုပ်ရပ်များအား ချေမှုန်းရီးလုပ်ငန်းများကို ပိုမိုတိုးတက်ကောင်းမွန်ရန်အတွက် တက်တက်ကြွကြွနန့် အတူတကွပူးပေါင်း ဆောင်ရွက်လားနိုင်ရန် အောက်ပါအတိုင်း သဘောထားထုတ်ပြန်အပ်ပါသည် ဟုဖော်ပြထားသည်။
ထုတ်ပြန်ချက်အရ ဒေသတည်ငြိမ်အီးချမ်းရီး၊ လုံခြုံရီးနန့် သူတပါး၏ အသက်အိုးအိမ်စည်းစိမ်များကို ထိခိုက်စီနိုင်သော (အကြမ်းဖက်လုပ်ရပ်များနန့် ကျူးလွန်သူများကို မည်သည့်အခါတွင်မျှအားမပီးဘဲ တားဆီးကာ တိုက်ဖျက်ချေမှုန်းလားပါ မည်ဖြစ်ကြောင်း၊ ရာဇ၀တ်မှုကျူးလွန်သည့်လုပ်ရပ်များနန့်ပတ်သက်သော ပစ္စည်းဥစ္စာများကို ဥပဒေနန့်အညီထိန်းသိမ်းပြီး စစ်ဆီးကာ နည်းမှန်လမ်းမှန် အရေးယူလားမည်ဖြစ်ကြောင်း၊ နိုင်ငံတကာမှလာရောက်ရင်းနှီးမြှုပ်နှံသော စီမံကိန်းများအား နှောင့်ယှက်ဖျက်ဆီးသူများကို ထိရောက်စွာအရေးယူဆောင် ရွက်လားမည်ဖြစ်ကြောင်းနန့် နိုင်ငံတကာရင်းနှီးမြှုပ်နှံမှုကုမ္ပဏီ (သို့မဟုတ်) ပုဂ္ဂိုလ်များအပေါ် အနှောင့်အယှက်ပီးခြင်း၊ဆက်ကြေးတောင်းခြင်း စသည့် ပြစ်မှုများကျူးလွန်သူ မည်သူ့ကို မဆို ဥပဒေအရ အရေးယူဆောင်ရွက်လားမည်ဖြစ်ကြောင်း ညီနောင်မဟာမိတ်(၃)ဖွဲ့က ဆိုသည်။
အလားတူ အကြမ်းဖက်လုပ်ရပ်အားကျူးလွန်သူများ၊ ရာဇဝတ်မှုကျူးလွန်သူများအား အကာအကွယ်ပီးနီသူများကို ဖြိုခွင်း တိုက်ဖျက် အရေးယူလားပါမည်ဖြစ်ကြောင်းနန့် လူကုန်ကူးခြင်းနန့် အတင်းအဓမ္မ လုပ်အားခိုင်းစီသူများကို ထိထိရောက် ရောက်အရေးယူဆောင်ရွက်လားပါမည်ဟုလေ့ ထုတ်ပြန်ချက်တွင်ဖော်ပြထားသည်။
ယင်းသို့ အကြမ်းဖက်လုပ်ရပ်များအား ကျူးလွန်သောသူများကိုတွိဟိပါက ၎င်းရို့ထံ အချိန်မီ သတင်းပို့ကတ်ပါရန်လေ့ ညီနောင်မဟာမိတ်(၃)ဖွဲ့က မိတ္တာရပ်ခံထားပြီး မြန်မာပြည်သူလူထုတရပ်လုံးနန့် ၎င်းရို့တော်လှန်ရီးအဖွဲ့အစည်းများအပေါ် အားပီးထောက်ခံကတ်သောသူများအနီနန့် ကမ္ဘာ့ငြိမ်းချမ်းရီး၊ အကြမ်းဖက်တိုက်ဖျက်ရီးနန့် ရာဇဝတ်မှုကျူးလွန်သည့် လုပ်ရပ်များအား ချေမှုန်းရီးလုပ်ငန်းများတွင် အတူတကွ တက်ကြွစွာပူးပေါင်းဆောင်ရွက်ကတ်ပါရန် အထူး တိုက်တွန်း ကြောင်းလေ့ ညီနောင်မဟာမိတ်(၃) ဖွဲ့၏ ထုတ်ပြန်ချက်တွင်ဖော်ပြထားသည်။
