APM ၊ ဧပြီ ၂ / ၂၀၂၃
တရုတ်နိုင်ငံသို့ အလည်ရောက်ဟိနီသည့် မလေးသျှားနိုင်ငံဝန်ကြီးချုပ် အန်နဝါအီဗရာဘင်နန့် တရုတ်နိုင်ငံ ဝန်ကြီးချုပ် လီချန်းရို့သည် ဧပြီ ၁ ရက်နိက ဘေဂျင်းမြို့တွင် တွိဆုံခကတ်ပြီး နှစ်နိုင်ငံအရေး ဆွေးဆွေးခကတ်ကြောင်း သိရသည်။
ဆွေးနွေးမှုအတွင်း တရုတ်ဝန်ကြီးချုပ်လီချန်းက တရုတ်နန့် မလေးသျှားရို့သည် ဖွံဖြိုးဆဲနိုင်ငံများအနီနန့် နောက်အဆင့်တွင် ပူးပေါင်းဆောင်ရွက်မှုကို မြှင့်တင်ရန် လိုအပ်ကြောင်း ပြောဆိုသည်။
ယင်းကဲ့သို့ပူးပေါင်းဆောင်ရွက်ရာတွင် တရုတ်-မလေးသျှား ဖွံ့ဖြိုးတိုးတက်ရီးအတွက် ဘက်ပေါင်းစုံပူးပေါင်းမှုကို မြှင့်တင် ရန်၊ ထွန်းသစ်စလုပ်ငန်းများတွင် ပူးပေါင်းဆောင်ရွက်မှု မြှင့်တင်ရန်နန့် ချစ်ကြည်ရင်းနှီးမှု၊အပြန်အလှန်ယုံကြည်မှု မြှင့်တင် ရန် ကြိုးပမ်းလားကတ်မည်ဟု တရုတ်ဝန်ကြီးချုပ်က ဆိုသည်။
ယင်းအပြင် တောင်တရုတ်ပင်လယ်အရေး ညှိနှိုင်းမှုများ အရှိန်မြှင့်ရန်၊ ဒေသတည်ငြိမ်အေးချမ်းရီးကို ပူးပေါင်းထိန်း သိမ်းရန်နန့် မလေးသျှားအပါအဝင် တခြားအာဆီယံနိုင်ငံများနန့် လက်တွဲဆောင်ရွက်ရန် အဆင်သင့်ဟိကြောင်းလေ့ တရုတ်ဝန်ကြီးချုပ်က ပြောကြားခသည်။
မလေးသျှားဝန်ကြီးချုပ် အန်နဝါအီဗရာဘင်ကလေ့ မလေးသျှားအစိုးရအနီနန့် မလေးသျှား-တရုတ် ဆက်ဆံရီး ဖွံ့ဖြိုးတိုး တက် စီရန်ဦးစားပီးလုပ်ဆောင်နီပြီး တရုတ်တပြည်တည်းမူဝါဒကို အခိုင်အမာထောက်ခံကြောင်း ပြောကြားသည်။
မလေးသျှားနိုင်ငံအနီနန့် တရုတ်နိုင်ငံ၏ ကမ္ဘာလုံးဆိုင်ရာ ဖွံ့ဖြိုးတိုးတက်ရီး အစပျိုးမှုနန့် လုံခြုံရီးအစပြုမှု၊ ယဉ်ကျေးမှု မြှင့်တင်မှုရို့တွင် ပံ့ပိုးနီပြီး တရုတ်၏ BRI (Belt and Road Initiative) စီမံကိန်းတွင် ပူးပေါင်းဆောင်ရွက်မှု၊ မော်တော် ယာဥ်၊ စွမ်းအင်၊ ခရီးလားလာရီး၊ စိုက်ပျိုးမွေးမြူရီးနန့် ဒစ်ဂျစ်တယ်စီးပွားရီးရို့တွင် တိုးမြှင့်ပူးပေါင်းဆောင်ရွက်လားရန် ဆန္ဒဟိကြောင်း မလေးသျှားဝန်ကြီးချုပ်က ပြောဆိုလားသည်။
ဆွေးနွေးပြောဆိုပြီးနောက် ဝန်ကြီးချုပ်နှစ်ဦးသည် စီးပွားရီး၊ ကုန်သွယ်မှု၊ စိုက်ပျိုးရီးနန့် အကောက်ခွန်ဆိုင်ရာ နှစ်နိုင်ငံ ပူးပေါင်းဆောင်ရွက်ရီး သဘောတူ စာတမ်းများကို လက်မှတ်ရွီးထိုးခကတ်ကြောင်း သိရသည်။
Source – Chinese premier holds talks with Malaysian PM
Photo – Xinhua
