APM ဒီဇမ်ဘာ ၂ /၂၀၂၃
ကျောက်ဖြူမြို့မာ ဒီဇမ်ဘာ ၁ ရက်နိက စစ်ကောင်စီတပ်နန့်ရဲတပ်ဖွဲ့ဝင်တိစွာ လူနီအိမ်တအိမ်ကို စီးနင်းဝင် ရောက်ရှာဖွီပြီးကေ ကားတစီးကို အတင်းအဓမ္မ ခြိမ်းခြောက် လုယူလားရေလို့ ဒေသခံတိကပြောပါရေ။
စစ်ကောင်စီ၏ မတရားသဖြင့်စီးနင်းဝင်ရောက်ရှာဖွီခံရရေအိမ်စွာ ကျောက်ဖြူမြို့၊ အနောက်ပိုင်းရပ်ကွက်၊ ဖြတ်လမ်း (၁)က ဦးတေဇာလင်း၏ နီအိမ်လို့သိရပါရေ။
ဒီဇမ်ဘာ ၁ ရက်နိ ညဇာ ၈ နာရီကျော်လောက်မာ ဦးတေဇာလင်း အိမ်မာမဟိရေအချိန် ကျောက်ဖြို့အခြီစိုက် စစ်ကောင်စီတပ်ဖွဲ့ဝင်တိနန့် ရဲတပ်ဖွဲ့ဝင် ပူးပေါင်းအင်အား ၂၀ လောက်စွာ ဦးတေဇာလင်း၏ နီအိမ်ကို စီးနင်း ဝင်ရောက်ရှာဖွီခကတ်ပါရေ။
ခရီးလွန်နီရေ ဦးတေဇာလင်းကိုလည်း မတွိ၊ နောက်ထပ်ရှာလို့ တခုချေလည်းမရဆိုခါ အိမ်ရှိမာ ရပ်ထားရေ Toyota Crown အမျိုးအစားကားကို အတင်းအဓမ္မ လုယူလားခပါရေ။
ကားကိုယူဖို့ ကားသော့မဟိခါ မိသားစုတိကို ” ကားသော့ ထုတ်ပီးကေပီး၊ မပီးကေ မိသားစုဝင်တိကို ဖမ်းယူလားဖို့”လို့ ခြိမ်းခြောက်တေလို့လည်း ဒေသခံတိက ပြောဆိုကတ်ပါရေ။
ဦးတေဇာလင်းစွာ သာမန်အရပ်သားစီးပွားရီးသမားတယောက်ဖြစ်ပြီးကေ လက်ဟိမာ ခရီးလွန်နီရေလို့ သိဟိရပါရေ။
