
APM ၊ ဒီဇမ်ဘာ ၂ / ၂၀၂၃
ဒီဇမ်ဘာ ၁ ရက်နိ ညည့်မာ မောင်တောမြောက်ပိုင်း၊ လောင်းဒုံကျေးရွာက ဒေသခံအမျိုးသားတယောက် တောဆင်ရိုင်းနင်းခံရလို့ သီဆုံးလားရေလို့သိရပါရေ။
သီဆုံးလားခလူကတော့ မောင်တောမြို့နယ်မြောက်ပိုင်း၊ လောင်းဒုံကျေးရွာက အသက် ၄၀ နှစ်အရွယ် ဦးဝင်းဇော် ဖြစ်ပါရေ။
ဦးဝင်းဇော်စွာ ဒီဇမ်ဘာ ၁ ရက်နိညည့်က လယ်ထဲကစပါးပုံနားမာ အိပ်မော ကျနီချိန် တောဆင်ရိုင်း အနင်းခံခရစွာဖြစ်ပြီးကေ သူ့ကို ရပ်သူရွာတိက ကြိမ်ချောင်းဆီးရုံသို့ အရေးပေါ်ပို့နိုင်ခကေလေ့ ဒဏ်ရာပြင်းထန်ရေအတွက် ညည့် ၂ နာရီလောက်မာ သီဆုံးလားခပါရေ။
မေယုတောင်တန်းက တောဆင်ရိုင်းတိစွာ ညည့်အချိန်မာ ဒေသခံတိစိုက်ပျိုးထားရေ စပါးခင်း၊ ဥယျာဉ်ခင်းတိ ထဲလို့ ဝင်ရောက်ကျက်စားလိဟိပြီးကေ မောင်တောမြို့နယ်မြောက်ပိုင်းက ဒေသခံတိစွာ ဒေဂုပိုင်တော ဆင်ရိုင်းအန္တရာယ်ကိုမကြာမကြာကြုံတွိရလိဟိကြောင်းသိရပါရေ။
