APM၊နိုဗမ်ဘာ ၂/၂၀၂၃
စစ်ကောင်စီဖမ်းဆီးထားရေ Development Media Group (DMG)သတင်းထောက် ကိုထက်အောင်ကို စစ်တွေမြို့နယ်တရားရုံးမာ လာဖို့ နိုဗမ်ဘာ ၁၃ ရက်နိ စလို့ ပထမအကြိမ် ရုံးထုတ်လားဖို့ လို့ သိရပါရေ။
DMG သတင်းထောက် ကိုထက်အောင်ကို လာဖို့နိုဗမ်ဘာ ၁၃ ရက်နိ ဆက်သွယ်ရီးဥပဒေ ပုဒ်မ ၆၅ နန့် စစ်တွေမြို့နယ် တရားရုံးမာ ပထမဆုံးအကြိမ်ရုံးထုတ်လားဖို့သိရကြောင်း တရားရုံးနန့် နီစပ်သူ တယောက်က APM ကို ပြောပါရေ။
ကိုထက်အောင်စွာ အောက်တိုဘာ ၂၉ ရက်နိက စစ်တွေမြို့ ဝင်္ကဘာကွင်းမာ ဓာတ်ပုံသတင်း ယူနီချိန် စစ်ကောင်စီတပ်ဖမ်းဆီးပြီးကေ အောက်တိုဘာ ၃၁ ရက်နိမာ ဆက်သွယ်ရီးဥပဒေပုဒ်မ ၆၅ နန့် ရဲစခန်းမာ အမှုဖွင့်ခပါရေ။
ကိုထက်အောင်ကို စလို့ဖမ်းခါက စစ်ကောင် စီ အထူးရဲတပ်ဖွဲ့ SB၊ အထူးစုံစမ်းရီးတပ်ဖွဲ့ စသုံးလုံး၊ ရဲတပ်ဖွဲ့နန့် စစ်ကောင်စီတပ်ဖွဲ့ဝင်စုပေါင်းအင်အား ၂၀ လောက်စွာ ရဲကား ၃ စီးနန့် စစ်တွေမြို့၊ စံပြရပ်ကွက်ဟိ DMG သတင်းဌာနရုံးသို့ ဝင်ရောက် စီနင်းပြီးကေ ရုံးဝန်ထမ်း(အစောင့်) ဖြစ်သူ ကိုစိုးဝင်းကိုပါ ဖမ်းယူလားခပါရေ။
ယေပြီးကေ DMG သတင်းဌာနရုံးခန်းထဲက ကွန်ပျူတာ၊ကင်မရာအပါအဝင် ရုံးသုံးပစ္စည်းတိအားလုံးကိုပါ သိမ်းယူလားပြီးကေ ရုံးခန်းကိုလည်း ချိပ်ပိတ်ထားခစွာဖြစ်ပါရေ။
