APM၊ ဂျန်နဝါရီ ၂ / ၂၀၂၄
ကျောက်တော်မြို့နယ်မာ ဒေနိ(ဂျန်နဝါရီ ၂ ရက်နိ)၊ နိခင်းပိုင်းက နယ်ချဲ့အကြမ်းဖက် စစ်ကောင်စီတပ်၏ ဒရုန်းအသုံးပြု ဒရော့ဗုံးကြဲချမှုကြောင့် အချေတယောက်အပါအဝင် ၂ ယောက်သီဆုံးလားပြီးကေ ၅ ယောက်ဒဏ်ရာပြင်းပြင်းထန်ထန် ရလားကြောင်း သိရပါရေ။
သီဆုံးလားရေလူနှစ်ယောက်စွာ ကျောက်တော်မြို့နယ်၊ မျောက်တောင်ရွာက မောင်ဉာဏ်ဟိန်းမင်း(၃ နှစ်)နန့် ကိုမောင်ပြား(၂၂ နှစ်)ဖြစ်ပြီးကေ ဒဏ်ရာရလားရေလူတိကတော့ ဦးကျော်သန်းလှိုင်(၃၁ နှစ်)၊ဒေါ်ပြားမ(၇၁ နှစ်)၊ ဒေါ်လှနုယဉ်(၄၂နှစ်)၊ ဒေါ်ဌေးဌေး(၃၉နှစ်) နန့် ဒေါ်ဦးညွန့်စိန်(၆၉နှစ်) ရို့ဖြစ်ကတ်ပါရေ။
နယ်ချဲ့အကြမ်းဖက် စစ်ကောင်စီတပ်စွာ ယင်းမျောက်တောင်ရွာကို ဒေနိ၊နိခင်း ၁၂ နာရီလောက်က တကြိမ်၊ နိခင်း ၂ နာရီ ၄၅ မိနစ်လောက်က တကြိမ်၊ (၂) ကြိမ်တိုင်တိုင် ဒရုန်းနန့် ဒရော့ ဗုံးကြဲချခပါရေ။
ဒရော့ဗုံးတိစွာ မျောက်တောင်ရွာထဲသို့ ကျရောက်ပေါက်ကွဲခလို့ မောင်ဉာဏ်ဟိန်းမင်းနန့် ကိုမောင်ပြားရို့ နှစ်ယောက်စွာ ဗုံးစကျပနာ နီရာမာပင် သီဆုံးလားခပါရေ။
အလားတူ ဦးကျော်သန်းလှိုင်၊ ဒေါ်ပြားမ၊ ဒေါ်လှနုယဉ်၊ ဒေါ်ဌေးဌေးနန့် ဒေါ်ဦးညွန့်စိန်ရို့လည်း ထိခိုက်ဒဏ်ရာတိရလားခ ပြီးကေ ယင်းအထဲက ဦးကျော်သန်းလှိုင်၊ဒေါ်ဌေးဌေးနန့် ဒေါ်ဦးညွန့်စိန်ရိုမာ ဒဏ်ရာပြင်းထန်ရေလို့ သိရပါရေ။
ရက္ခိုင်ပြည်မာ ရက္ခိုင့်တပ်တော်AA နန့် နယ်ချဲ့ အကြမ်းဖက် စစ်ကောင်စီတပ်ရို့အကြား တကျော့ပြန်တိုက်ပွဲတိ စတင်ဖြစ် ပွားရေနောက်ပိုင်း အယှုံးနန့်ရင်ဆိုင်နီရရေ စစ်ကောင်စီတပ်စွာ အရပ်သားပြည်သူတိနီထိုင်ရေရပ်ရွာတိကို လက်နက်ကြီး၊ လက်နက်ချေတိ၊ စစ်သင်္ဘောတိ၊ တိုက်လီယာဉ်၊ ရဟတ်ယာဉ်တိနန့် ဒရုန်းတိ အသုံးပြုပြီးကေ နိစဉ်ရက်ဆက်၊ ရည်ရွယ် ချက်ဟိဟိ ယမ်းကား ပစ်ခတ်တိုက်ခိုက်နီပါရေ။
အကြမ်းဖက် ဖက်ဆစ်စစ်ကောင်စီ၏ ယမ်းကားပစ်ခတ်မှုကြောင့် တကျော့ပြန်တိုက်ပွဲစတင်ခရေ၂၀၂၃ ခုနှစ်၊ နိုဗမ်ဘာ ၁၃ ရက်နိကနီ ဒေနိအထိ ၂ လကျော်ကာလအတွင်း ရက္ခိုင်ပြည်မြို့နယ်အသီးသီးက အပြစ်မဲ့အရပ်သားပြည်သူ ၆၀ နီးပါး သီဆုံးခရပြီးကေ ထိခိုက်ဒဏ်ရာရလူ ၂၀၀ နီးပါးအထိ ဟိလာနီပါရေ။
