APM ၊ ဩဂတ်စ် ၁၉ /၂၀၂၃
မြောက်ဦး၊ သျှစ်သောင်းစစ်ဖီးယှောင်စခန်းတွင် လက်ဟိ၌ စားနပ်ရိက္ခာအကူညီများ အရေးတကြီး လိုအပ်နီကြောင်း သိရသည်။
သျှစ်သောင်းစစ်ဖီးယှောင်စခန်းတွင် အိမ်ထောင်စု ၅၉ စုနန့် လူဦးရေ ၁၈၀ လောက် နီထိုင်လျက်ဟိသည်။
စစ်ဖီးယှောင်များမှာ စားဝတ်နီရီးအတွက် မြို့ပေါ်တွင် နိစားအလုပ်များ လုပ်ကိုင်နီကတ်ရလူများဖြစ်ပြီး ဝင်ငွေနည်းပါးမှု ကြောင့် စားသောက်နီထိုင်ရီး ဆိုးဝါးစွာ အခက်ကြုံနီကတ်ရသည်ဟု စစ်ဖီးယှောင်များက ပြောသည်။
အကူညီလာရောက်ထောက်ပံ့မှု နည်းပါးမှုကြောင့်လေ့ စစ်ဖီးယှောင်များမှာ ပို၍ အခက်ကြုံနီကတ်ရပြီး စားနပ်ရိက္ခာများပင် ပြတ်လပ်လျက်ဟိသည်ဟုဆိုသည်။
ယင်းအပြင် အလုပ်အကိုင်ယှားပါးမှု၊ စားဝတ်နီရီးအဆင်မပြေမှုများလာမှုကြောင့် သားသမီးများ၏ ပညာရီး၊ ကျမ်းမာရီး များတွင်လေ့ ထောက်ပံ့နိုင်မှု အားနည်းလာသည်ဟု သိရသည်။
သျှစ်သောင်းစစ်ဖီးယှောင်စခန်းဟိ စစ်ဖီးယှောင်များမှာ ၂၀၁၈-၂၀၁၉ တိုက်ပွဲကာလနန့် တကျော့ပြန်တိုက်ပွဲကာလအတွင်း ကပင်ရွာဟောင်းတော၊ ပေါက်တောပြင်၊ တောင်ဦးစသည့်ရွာများမှလာရောက်ခိုလှုံလာကတ်လူများဖြစ်ကြောင်း သိရသည်။
