(ကျေးလက်ဆီးခန်းနန့်ရုံးဆောင်တဆောင်အပါအဝင် လူနီအိမ် ၄ ဆောင်လုံးဝပျက်စီး)
APM ၊ မေ ၁၉ / ၂၀၂၄
မောင်တောမာ ဒေနိ(မေ ၁၉ ရက်နိ) ၊မိုးထက အကြမ်းဖက်စစ်ကောင်စီ ဂျက်ဖိုက်တာတစီးနန့် နှစ်ကြိမ်တိုင်တိုင် ဗုံးကြဲတိုက်ခိုက်လို့ စစ်ဖီးယှောင်အပြစ်မဲ့ပြည်သူ ၂ယောက်ထိခိုက်ဒဏ်ရာရဟိလားရေလို့ သိရပါရေ။
ဒဏ်ရာရဟိလားရေလူတိကတော့ မောင်တောမြို့နယ်၊ သရီကုန်ဘောင်ရွာမာ စစ်ဖီးယှောင်နီရေ မောရဝတီရွာက ဦးစိန်လှဖြူ (၆၄ နှစ်) ၊သစ်တောရွာက ဦးမောင်ဆိုး(၄၄နှစ်)ရို့ဖြစ်ပါရေ။
ဒေနိ၊ မေ ၁၉ ရက်နိ၊ မိုးထ ၁၀ နာရီ မိနစ်၃၀ လောက်က အကြမ်းဖက်စစ်ကောင်စီစွာ မောင်တောမြို့နယ်၊ သရီကုန်ဘောင်ရွာသို့ ဂျက်ဖိုက်တာတစီးနန့်ရောက်ဟိလာပြီး၊ရွာဟိ ကျေးလက် ဆီးခန်းကို နှစ်ကြိမ်တိုင်တိုင် ရည်ရွယ်ချက်ဟိဟိ ဗုံးကြဲတိုက်ခိုက်ခပါရေ။
အကြမ်းဖက်စစ်ကောင်စီက ယင်းပိုင် ပစ်ခတ်တိုက်ခိုက်လို့ သရီကုန်ဘောင်ရွာမာ စစ်ဖီးယှောင်နီရေ ဦးစိန်လှဖြူနန့် ဦးမောင်ဆိုးရို့မာ ဗုံးစထိမှန်ပနာ ထိခိုက်ဒဏ်ရာ ရလားခပါရေ။
ယင်းအပြင် ဆီးခန်းတခုလုံးမာလည်းလုံးဝပျက်စီးလားခရေပိုင် အပါးဟပ်စပ်ဟိ ရုံးဆောင်တဆောင်နန့် လူနီအိမ် ၄ လုံးမာလည်းလုံးဝပျက်စီးလားရေလို့ သိဟိရပါရေ။
