APM ၊ ဧပြီ ၁၉ / ၂၀၂၃
ပုဏ္ဏားကျွန်းမြို့နယ် ယိုးတရုတ် စစ်ဖီးယှောင်စခန်းတွင် အကူအညီများ လာရောက်နည်းပါးနီ၍ ဆန်အပါအဝင် အခြီခံစားနပ်ရိက္ခာများ အရေးပေါ်အကူအညီလိုအပ်နီကြောင်းသိရပါသည်။
ယင်းစစ်ဖီးယှောင်စခန်းတွင် ခိုလှုံနီကတ်သူအများစုမှာ ပြီးခသည့်တကျော့ပြန်တိုက်ပွဲကာလအတွင်းက နီရပ်စွန့်ခွာ တိမ်းယှောင်လာကတ်ရသည့် ကျောက်တော်နန့် ပုဏ္ဏားကျွန်းမြို့နယ်ဟိ ဒေးဝန်း၊ ချောင်းတူ၊ ကွမ်းအုံစု၊ ဘုတ္တော၊ ရွက်ညှိးတောင် စသည့်ကျေးရွာများမှ ရွာသားများဖြစ်သည်။
လက်ဟိတွင် အဆိုပါစစ်ဖီးယှောင်စခန်းသို့ အလှူသျှင်များ လာရောက်လှူဒါန်းမှုနည်းပါး၍ စခန်းဟိ စစ်ဖီးယှောင် များမှာ တရက်တာစားနပ်ရိက္ခာကို ခက်ခက်ခဲခဲရှာဖွီစားသောက်နီကတ်ရကြောင်း စစ်ဖီးယှောင်များက ပြောသည်။
ယင်းအပြင် တချို့မိသားစုဝင်များသည့် စစ်ဖီးယှောင်များတွင် တရက်စာ တရက်ရှာစား၍ မလောက်မငှနန့် ဖြစ်တေပိုင် စားသောက်နီကတ်ရကာတချို့ဆိုလျှင်ထမင်း နပ်မမှန်သူများပင် ဟိသည်ဟု ဆိုသည်။
ယင်းယိုးတရုတ် စစ်ဖီးယှောင်စခန်းတွင် အိမ်ထောင်စု ၁၅၉ စုနန့် လူဦးရေ ၆၂၇ ယောက်ခိုလှုံလျက်ဟိကြောင်း သိဟိရပါသည်။
