APM ၊ မာ့ချ် ၁၉ /၂၀၂၄
ဂွမြို့နယ်၊ ကျိန္တလီမြို့မာ ဒေနိ မာ့ချ် ၁၉ ရက်၊မိုးထ ၉ နာရီအချိန်လောက်က စစ်မှုမထမ်းလိုရေ အာရက္ခပြည်သူရို့၏ နီအိမ်တိကို အကြမ်းဖက်စစ်ကောင်စီ ဝင်ရောက်မွှီနှောက် ရှာဖွီမှုတိ လုပ်ခရေလို့ သိရပါရေ။
မာ့ချ် ၁၉ရက်နိ မိုးထ ၉ နာရီအချိန်လောက်က ဂွမြို့အခြီစိုက် အကြမ်းဖက်စစ်ကောင်စီတပ် ခမရ(၅၆၃)က တပ်ဖွဲ့ဝင် အင်အား ၃၀ လောက်ပါရေ ကားတစီးစွာ ကျိန္တလီမြို့၊ အမှတ်(၃) ရပ်ကွက်၊ သဖန်းကွင်းသို့ ရောက်လာပြီးကေ စစ်မှုမထမ်းချင်လို့ ယှောင်နီကတ်တေ အာရက္ခပြည်သူရို့၏ နီအိမ်တိကို ဝင်ရောက်မွှီနှောက်ရှာဖွီခရေလို့ မြို့ခံတိက ပြောပါရေ။
ယင်းပိုင်ရှာဖွီရေ အကြမ်းဖက်စစ်ကောင်စီတပ်ဖွဲ့ဝင်တိစွာ အိမ်မာဟိရေ ဖုန်း၊ဆိုင်ကယ်နန့် စာရွက်စာတမ်းတိကို ခိုးယူဆောင်ပနာ မိုးထ ၁၀ နာရီခွဲလောက်မာ ဂွမြို့သို့ ပြန်လည်ထွက်ခွာလားခရေလို့ ဆိုပါရေ။
ကုန်ခရေ မာ့ချ် ၆ ရက်နိကလည်း အကြမ်းဖက် စစ်ကောင်စီစွာ ပြည်သူ့စစ်သင်တန်းတက်ဖို့အတွက် ကျိန္တလီမြို့က ရပ်ရွာအုပ်စုတစုကို လူ၂၀ ကျစီပီးရဖို့လို့ အတင်း အဓမ္မတောင်းခပါသိမ့်ရေ။
ရက္ခိုင်ပြည်တဝန်း ၎င်းရို့၏ တပ်မ၊တပ်ရင်း၊တပ်စခန်းတိကိုစွန့်လွှတ်ထားရပနာအယှုံးနန့်ရင်ဆိုင်နီရရေအကြမ်းဖက်စစ်ကောင်စီစွာ စစ်အင်အားပြုန်းတီးမှုကို အစားထိုးဖို့အတွက် ပြည်သူ့စစ်၊ စစ်မှုထမ်း ဂေါင်းစဉ်တိ တပ်ပနာ အတင်းအဓမ္မစစ်သားစုဆောင်းလျက်ဟိကြောင်းလည်းသိရပါရေ။
