APM၊ ဒီဇမ်ဘာ ၁၉ / ၂၀၂၃
ကျောက်ဖြူဒေသအတွင်း ရီကြောင်းခရီးလားလာခွင့်ပိတ်ထားစွာကို စစ်ကောင်စီက ဒေနိ(ဒီဇမ်ဘာ ၁၉ရက်နိ)ကနီ ၂၀၂၄ ခုနှစ်၊ဖေဖော်ဝါရီ ၁၉ ရက်ထိ နောက်ထပ် နှစ်လ သက်တမ်းထပ်တိုးလိုက်ပါရေ။
ထုတ်ပြန်ချက်အရ “ကျောက်ဖြူမြို့နယ်အတွင်း မြို့နယ်/မြို့နန့်ထိစပ်နီရေ ပင်လယ်/ မြစ်ကမ်းတလျှောက် (လိပ်ခမော် ကျေးရွာအုပ်စု၊ ဂုံးချိန်ကျေးရွာအုပ်စု၊ နတ်ကျောက်ကမ်းခြီ၊ ဆိတ်ကျွန်း၊ သာဿနာ ၂၅၀၀ ကမ်းခြီ၊ စေတီတောင်ရပ်ကွက်၊အစိုးရရပ်ကွက်၊သန်ပန်ချောင်းရပ် ကွက်၊ မြစ်နားတန်းရပ်ကွက်၊ ကုလားပိုက်ဆိပ်ရပ်ကွက်၊ ပြင်ဖြူမော်ရပ်ကွက်၊ ကညင် တောရပ်ကွက်၊ ငလပွိရပ် ကွက်၊အုန်းချောင်း/ ငလပွိချောင်း၊ စိုင်ခြုံကျေးရွာ အုပ်စု၊ အောင်စေတီရွာ၊ ကပ်သပြီ ကျေးရွာ အုပ်စု၊ ကန္ဒီးကျေးရွာ အုပ်စု၊ မြို့နန့်ထိစပ်နီရေ ကမ်းခြီဒေသတိ၊ သံဇစ်မြစ်အတွင်း)ဟိ ကမ်းခြီဒေသတိ၊ ရီဒေသတိ၊ ရီနယ်နိမိတ်တိမာ ဇာသူမဆို အမိန့်တစုံတရာမရဟိဘဲ ၂၄ နာရီ ကာလပတ်လုံး စက်လှီ၊ ဟွန်ဒါစက်လှီတိ လားလာခြင်း၊ ငါးဖမ်းဆီးခြင်းမပြုလုပ်ရ၊ လောင်း၊ ဟွန်ဒါစက်လှီ၊ စက်လှီ(ကြီး/ငယ်)၊ ကမ်းဝီး ငါးဖမ်းလှီတိ ဖြတ်သန်းလားလာခြင်း၊ ကမ်းကပ်ခြင်းမပြုလုပ်ရ၊ ပင်လယ်မြစ်ကမ်းတလျှောက် ဆိပ်ကမ်းနီရာတိမာ ဝိုင်းဖွဲ့ပြီးကေ အရက်သီစာသောက်စားခြင်း၊ ဝိုင်းဖွဲ့ပြီးကေ တေးခြင်းဆိုခြင်း၊ အော်ဟစ်ဆဲဆိုခြင်း၊ ခိုက်ရန်ဖြစ်ပွားခြင်းမပြုလုပ်ရ လို့ဆိုပါရေ။
ဒေအမိန့်စွာ ထုတ်ပြန်ရေနိကစလို့ ၂၀၂၄ ခုနှစ်၊ ဖေဖော်ဝါရီ ၁၉ ရက်နိအထိ အတည်ဖြစ်ပြီးကေ တားမြစ်အမိန့်ကို ဖောက်ဖျက်ကျူးလွန်ပါက တည်ဆဲဥပဒေတိအရ အရေးယူဖို့လို့လည်း စစ်ကောင်စီက ဖော်ပြထားပါရေ။
ကုန်ခရေ နိုဗမ်ဘာ ၁၉ ရက်နိကလည်း စစ်ကောင်စီစွာ ဒေအမိန့်ကို တလသက်တမ်းနန့်အတည်ပြုထုတ်ပြန်ခသိမ့်ပြီးကေ ဒေဂုစွာ နောက်ထပ်နှစ်လသက်တမ်းတိုးလိုက်စွာ ဖြစ်ပါရေ။
ရသေ့တောင်၊ မင်းပြား၊ ပေါက်တော၊ ပုဏ္ဏားကျွန်းစရေ မြို့နယ်တိမာလည်း စစ်ကောင်စီစွာ ရက္ခိုင့်တပ်တော် နန့် တိုက်ပွဲစတင်ဖြစ်ပွားပြီးနောက်ပိုင်းကစလို့ ရီကြောင်းခရီးလားလာကတ်တေ ဒေသခံအပြစ်မဲ့ပြည်သူတိကို ပွိုင့်ဖိုက် သီနတ်တိနန့် ပစ်ခတ်နီစွာတိဟိနီပါရေ။
စစ်ကောင်စီ၏ အမိန့်ထုတ်ပြန်ချက်နန့်ပတ်သက်လို့ ဒေသခံပြည်သူတယောက်က ” AA ကိုကြောက်လို့ ရမိရရာ အမိန့်တိထုတ်နီစွာ၊ ဒေသခံပြည်သူတိကို ခြိမ်းခြောက်၊ ဖိနှိပ်၊ သတ်ဖြတ်ဖို့တမင်တကာအကွက် ဆင်နီစွာလို့မြင်ရေ။ အရာတဖက်မာ ဒေသခံရက္ခိုင်ပြည်သူတိကို အငတ်ဖီးဆိုက်အောင် ရည်ရွယ်ချက်ဟိဟိလုပ်နီရေ လူမဆန်ရေ လုပ်ရပ်လို့ မြင်ပါရေ” လို့ မှတ်ချက်ပြုပြောဆိုလားခပါရေ။
