APM၊ ဩဂတ်စ် ၁၈ / ၂၀၂၃
ရက္ခိုင်ကမ်းရိုးတန်းတလျှောက်တွင် မိုးသက်လီပြင်းများကျရောက်နိုင်ကြောင်း မိုးလီဝသနန့် ဇလဗေဒညွှန်ကြားမှု ဦးစီးဌာနက ဒေနိ(ဩဂတ်စ် ၁၈ ရက်နိ)ညဇာ ၄ နာရီတွင်ထုတ်ပြန်သည်။
ထုတ်ပြန်ချက်အရ ” ရက္ခိုင်ကမ်းရိုးတန်းတလျှောက်နန့်ကမ်းလွန်ပင်လယ်ပြင်ရို့တွင် တခါတရံ မိုးသက်လီပြင်း များကျရောက်ပြီး လှိုင်းအသင့်အတင့်မှ လှိုင်းကြီးနိုင်ပါသည်။ မိုးသက်လီပြင်းကျစဉ် ရီပြင်/မြီပြင် လီသည် တနာရီလျှင် မိုင် ၃၀ မှ ၃၅ မိုင်အထိ တိုက်ခတ်နိုင်ပါသည် ဟုဆိုသည်။
လှိုင်းအမြင့်မှာ မြစ်ဝကျွန်းပေါ်၊ ရက္ခိုင်ကမ်းရိုးတန်းတလျှောက်နန့် ကမ်းလွန်ပင်လယ်ပြင်ရို့တွင် ၇ ပေမှ ၉ ပေလောက်အထိ ဟိနိုင်ကြောင်းလေ့ မိုး/ဇလကဆိုသည်။
ဘင်္ဂလား ပင်လယ်အော်အနောက်မြောက်ပိုင်း၌ဖြစ်ပေါ်နီသော လီဖိအားနည်းရပ်ဝန်း(Low Pressure Area)သည်လေ့ အနောက်-အနောက်မြောက်ဖက်သို့ ရွိလားခပြီး အိန္ဒိယနိုင်ငံ၊ အနောက်ဘင်္ဂလားပြည်နယ်-ဩရိဿပြည်နယ် မြောက်ပိုင်းကမ်းခြီတွင် ဆက်လက် တည်ဟိနီကာ နောက် ၃၆ နာရီအတွင်း အိန္ဒိယနိုင်ငံ၊ ဩရိဿပြည်နယ်မြောက်ပိုင်းနန့် ချက်တစ်ဂတ်ပြည်နယ် မြောက်ပိုင်းရို့ကို ဖြတ်ကျော်ဝင်ရောက်နိုင်သည်ဟုလေ့ မိုး/ဇလက ခန့်မှန်းထားသည်။
