APM ၊ ဩဂတ်စ် ၁၈ / ၂၀၂၃
ရက္ခိုင့်တပ်တော် AA နန့်ဆက်စပ်သည်ဟုဆိုကာ မတရားအသင်းဆက်သွယ်မှု ဥပဒေပုဒ်မ ၁၇(၁)နန့် တရားစွဲခံ ထားရသည့် မြောက်ဦးမြို့နယ်၊ တိမ်ညိုရွာဟိ သာလီစွဆီဆိုင်ပိုင်သျှင်အမှုကို ဒေနိ(ဩဂတ်စ် ၁၈ ရက်နိ)တွင် မြောက်ဦးမြို့နယ်တရားရုံး၌ ရုံးထုတ်ခပြီး မြို့နယ်တရားသူကြီး ဒေါ် လဝန်းအိမ် က အကြောင်းပြချက် တစုံတရာ မဟိဘဲ ရုံးချိန်းထပ်ရွှိလိုက်ကြောင်း သိရသည်။
ပုဒ်မ ၁၇(၁)နန့် တရားစွဲခံထားရသည့် သာလီစွ ဆီဆိုင်ပိုင်သျှင်မှာ ဦးကျော်သိန်းလှိုင်(၄၆)နှစ်ဖြစ်သည်။
အမှုကို ဒေနိတွင် မြောက်ဦးမြို့နယ်တရားရုံး၌ ရုံးထုတ်ခကေလေ့ မြို့နယ်တရားသူကြီး ဒေါ် လဝန်းအိမ် က တစုံတရာပြောဆိုခြင်းမဟိဘဲ လာမည့် ဩဂတ်စ် ၂၅ ရက်နိသို့ ရုံးချိန်းထပ်ရွှိလိုက်သည်။
ဦးကျော်သိန်းလှိုင်သည် မြောက်ဦးမြို့ ထမ္မရာဇ်ရပ်ကွက်တွင်နီထိုင်သူဖြစ်ပြီး ကုန်ခသည့် ၂၀၂၂ ခုနှစ် အောက်တိုဘာ ၂၃ ရက်နိတွင် မြန်မာစစ်တပ် တပ်ဖွဲ့ဝင်များက ၎င်းနီထိုင်ရာ ထမ္မရာဇ်ရပ်ကွက်မှ နီအိမ်ထဲသို့ ဝင်ရောက်ဖမ်းဆီးခခြင်း ဖြစ်သည်။
ယင်းနောက် ဦးကျော်သိန်းလှိုင်ကို စရဖတပ်ဖွဲ့မှ ဗိုလ်ကြီး ကျော်ကျော်ထွန်းဆိုသူ တရားလိုလုပ်၍ မြောက်ဦးမြို့နယ်တရားရုံး၌ ပုဒ်မ ၁၇(၁)နန့် တရားစွဲထားခြင်း ဖြစ်သည်။
လက်ဟိတွင် ဦးကျော်သိန်းလှိုင်ကို မြောက်ဦးမြို့မရဲစခန်း၌ ထိန်းသိမ်းချုပ်နှောင်ထား အမှုအားအပြီးသတ်အမိန့်ချရန်ရာ ကျန်နီကာ ရုံးချိန်းအကြိမ်ကြိမ်အရွှိခံနီရ၍ နစ်နာနီရကြောင်း သိရသည်။
