APM၊ ဂျူလိုင် ၁၈ / ၂၀၂၃
ထိုင်းနိုင်ငံတောင်ပိုင်း၊ ချွန်ဖွန်ပြည်နယ်တွင် ရာဘာခြံတခုအတွင်းမြန်မာလုပ်သား ၃ ယောက်နန့် ထိုင်းနိုင်ငံသား ရာဘာခြံ ပိုင်သျှင် ၁ ယောက် သီနတ်နန့်ပစ်ခတ်ခံရ၍ သီဆုံးသည့်အမှု၌ ပြစ်မှုကျူးလွန်သူကို ရဲတပ်ဖွဲ့က ဂျူလိုင် ၁၇ ရက်နိ ဖမ်းမိခကြောင်း ထိုင်းသတင်းများက ဖော်ပြသည်။
ကုန်ခသည့် ဂျူလိုင် ၁၆ ရက်နိက ချွန်ဖွန်ပြည်နယ်၊ဆဝီမြို့နယ်၊ နာဆက်ကျေးရွာ အုပ်စုဟိ ရာဘာခြံတွင်ဖြစ်ပွားခသည့် အဆိုပါ သတ်ဖြတ်မှုဖြစ်စဉ်အတွင်း ပြစ်မှုကျူးလွန်သူမှာ အသက် ၄၄ နှစ်အရွယ် ထိုင်းနိုင်ငံသား ပရာဖန် ဆိုသူဖြစ်ပြီး သီဆုံးခသည့် ရာဘာခြံနန့် ကပ်နီသည့် ရာဘာခြံ၏ ပိုင်သျှင်ဖြစ်ကြောင်း သိရသည်။
ပရာဖန်၏ ထွက်ဆိုချက်အရ သီဆုံးသူ ရာဘာခြံပိုင်သျှင်နန့် မြန်မာလုပ်သား ၃ ယောက်ရို့သည် ၎င်း၏ခြံအတွင်းမှ ရာဘာပင်များကို ဓားနန့်ခွတ်ခြင်း၊ ရာဘာစီးများကို ခိုးယူရောင်းစားခြင်းများ ပြုလုပ်နီသည့်အတွက် သီနတ်နန့် ပစ်သတ်လိုက်သည်ဟု ဆိုသည်။
ပြစ်မှုကျူးလွန်သူသည် လူသတ်မှုဖြစ်ပြီးနောက် ကားတစီးဖြင့်ထွက်ဗြီးရာ လမ်းတွင် ကားမှောက်၍ တောင်ကုန်းတကုန်းထက်၌ ပုန်းခိုနီစဉ် ရဲတပ်ဖွဲ့က ဖုန်းအချက်ပြစနစ်မှတဆင့် ခြီရာခံမိရာမှ ဖမ်းမိခြင်းဖြစ်သည်။
လက်ဟိတွင် သူ့ကို ဆဝီအကျဉ်းထောင်တွင် ဖမ်းဆီးထားပြီးရည်ရွယ်ချက်ဟိဟိ လူသတ်မှု၊ မီးတိုက်မှု၊ တရားမဝင် လက်နက် ကိုင်ဆောင်မှု၊ သီနတ်ဖြင့် လုယက်မှုရို့နန့် အရေးယူလားမည်ဟု ရဲတပ်ဖွဲ့က ပြောကြားသည်။
အဆိုပါ လူသတ်တရားခံ ပရာဖန်မှာ မူးယစ်ဆီးဝါးသုံးစွဲသူတယောက်ဖြစ်ပြီး အယင်ကလေ့ ရာဘာခြံများတွင် အလုပ်လုပ်နီသည့် မြန်မာလုပ်သားများအား သီနတ်ပြ ခြိမ်းခြောက်ခြင်းများ ပြုလုပ်လိဟိကြောင်း သိဟိရသည်။
Source – Haunted young man shoots and kills brutally, 4 bodies, both neighbors, 3 Burmese workers, resentful of stealing rubber/ Thailand Post
Photo – Thailand Post
