APM ၊ ဧပြီ ၁၈ / ၂၀၂၃
အမေရိကန်နိုင်ငံ၊ အလာဘားမားပြည်နယ်၊ ဒိတ်ဗဲလ်မြို့မှာ ဧပြီ ၁၅ ရက်နိညည့်က မွီးနိပါတီကျင်းပနီစဉ် သီနတ် နန့် ပစ်ခတ်၍ လူ ၄ ယောက်သီဆုံးပြီး ၂၈ ယောက်ထိခိုက်ဒဏ်ရာရလားကြောင်း သိရသည်။
ပစ်ခတ်မှုဖြစ်စဉ်အတွင်း ဒဏ်ရာရလားသူများမှာ ဒိတ်ဗဲလ်မြို့ဆီးရုံတခု၌ ဆီးကုသမှုခံယူနီပြီး ယင်းအနက်က ၅ ယောက်မှာ စိုးရိမ်ရသည်ဟု ဆိုသည်။
ကုန်ခသည့်စနီနိ၊ ဒေသစံတော်ချိန် ညည့် ၁၀ နာရီ ခွဲခန့်မှာ ဖြစ်ပွားခသည့် အဆိုပါပစ်ခတ်မှုဖြစ်စဉ်နန့် ပတ်သက်၍ အသေး စိတ်အချက်အလက်များကိုတော့ သက် ဆိုင်ရာက ထုတ်ပြန်ခြင်းမဟိသိမ့်ပါ။
ဒိတ်ဗဲလ်မြို့အနားက ကန်တက်ကီ နန့် တန်နက်ဆီ ပြည် နယ်များ၌လေ့ မကြာသိမ့်ခင်ကအစုလိုက်အပြုံလိုက် ပစ်ခတ်မှု (၂) ကြိမ် ဖြစ်ပွားခသိမ့်သည်။
ကန်တက်ကီပြည်နယ်၊ လူဝီဗဲလ်မြို့မှာ ပြီးခသည့်ဧပြီ ၁၀ ရက်နိက ဘဏ်ဝန်ထမ်းတယေက်၏ ပစ်ခတ်မှုကြောင့် လုပ်ငန်း ခွင်လုပ်ဖော်ကိုင်ဖက် ၅ယောက် သီဆုံးခပြီး ၉ ယောက်ဒဏ်ရာရလားခသည်။
အလားတူ တန်နက်ဆီပြည်နယ်၊ နက်ချ်ဗီးလ်မြို့ဟိပုဂ္ဂလိ က ခရစ်ယာန်ကျောင်းတကျောင်းမှာ ပြီးခသည့် မာ့ချ်လ ၂၇ ရက် နိက ကျောင်းသားဟောင်းတယောက် သီနတ်နန့် ပစ်ခတ်မှုကြောင့် အသက် ၉ နှစ်အရွယ် အချေ ၃ယောက်အပါအဝင် လူ ၆ ယောက် သီဆုံးခရသိမ့်သည်။
၂၀၂၃ ခုနှစ် ၃ လကျော်အတွင်း အမေရိကန်နိုင်ငံမှာ အစုလိုက် အပြုံလိုက် ပစ်ခတ်မှုပေါင်း (၁၄၆)ကြိမ်ထက်မနည်းဟိခပြီးဖြစ်ကြောင်း သိရသည်။
Ref; Alabama birthday party shooting leaves 4 dead and 28 injured
Photo – CNN
