APM ၊ ဒီဇမ်ဘာ ၁၈ / ၂၀၂၃
မြောက်ဦး မြို့နယ်အတွင်းမာ တိုက်ပွဲဖြစ်ပွားခစွာ လုံးဝ မဟိပါဘဲ ဒေနိ(ဒီဇမ်ဘာ ၁၈ ရက်နိ) မိုးထ ၇ နာရီ ၃၈ မိနစ်မာ စစ်ကောင်စီက မြောက်ဦးမြို့ကို လက်နက်ကြီးနန့် ပစ်ခတ်တိုက်ခိုက်ခကြောင်း ညီနောင်မဟာမိတ် (၃) ဖွဲ့က ထုတ်ပြန်ပါရေ။
ထုတ်ပြန်ချက်မာ “၂၀၂၃ ခုနှစ်၊ ဒီဇမ်ဘာ (၁၈) ရက်နိ၊မိုးထ ၇ နာရီ ၃၈ မိနစ်အချိန်မာ ရက္ခိုင်ပြည်၊ မြောက်ဦးမြို့အခြီစိုက် ခမရ (၅၄၀) တပ်ရင်းက အရပ်သားပြည်သူတိနီထိုင်ရာ မြောက်ဦးမြို့၊ အလယ်ဈီးရပ်ကွက်အတွင်းဟိ ရွှီတောင်ဘုရားကြီးအောက်သို့ ၁၂၀ မမ လက်နက်ကြီးနန့် (၁) ကြိမ် ပစ်ခတ် ခြောက်လှန့်ခရေ လို့ဖော်ပြထားပါရေ။
ယင်းအပြင် ပေါက်တောမြို့တွင်းမာလည်း ရက္ခိုင့်တပ်တော် (AA) နန့် စစ်ကောင်စီတပ်ဖွဲ့ဝင်တိအကြား ညဇာ ၇ နာရီဝန်းကျင်လောက်မာတိုက်ပွဲ အပြင်းအထန်ဖြစ်ပွားခပြီးကေ စစ်ကောင်စီ၏ စစ်တွေအခြီစိုက် အမှတ် (၁၂) ရဲတပ်ရင်းက လက်နက်ကြီးတိနန့် ပေါက်တောမြို့ကို ပစ်ခတ်တိုက်ခိုက်ခရေလို့ ဆိုပါရေ။
အလားတူ ဒေနိမိုးထ ၈ နာရီ ၁၃ မိနစ်လောက်ကလည်း ရမ်းဗြဲကျွန်း၊ ရမ်းဗြဲမြို့၏တောင်ဖက် မီတာ (၂၀၀) ကျော်အကွာအဝီးဟိ အောင်ချမ်းသာစေတီတည်ထားရာ တောင်ထက်မာ စစ်ကောင်စီတပ်ဖွဲ့ဝင်တိနန့် ရက္ခိုင့်တပ်တော် AA ရို့ ရုတ်ချည်းရင်ဆိုင်ထိတွိတိုက်ပွဲ ဖြစ်ပွားခကြောင်း သိရပါရေ။
ယင်းတိုက်ပွဲအတွင်း စစ်ကောင်စီစွာ စစ်သင်္ဘော၊ ဒရုန်းတိနန့်လည်း လာရောက်တိုက်ခိုက်ခကေလေ့ စစ်ကောင်စီတပ်သား ၄ ယောက်သီဆုံးခရရေပိုင် စစ်ကောင်စီ၏ လက်နက်ခဲယမ်း၊ စစ်အသုံး အဆောင်ပစ္စည်းအချို့ သိမ်းဆည်းရမိခရေလို့ ညီနောင် (၃) ဖွဲက ဆိုပါရေ။
ယင်းအပြင် နိခင်း ၁၂ နာရီလောက်မာ စစ်ကောင်စီ၏ ဂျက်ဖိုက်တာနန့် စစ်ရဟတ်ယာဉ် (၂) စီးစွာ ရမ်းဗြဲမြို့နန့် အနီးအနားကျေးရွာတိသို့ လာရောက်ဗုံးကြဲတိုက်ခိုက်ခလို့ မြို့ထဲရပ်ကွက်တိက နီအိမ်အချို့နန့် ဆီဆိုင်တန်း မီးလောင်ပျက်စီးခရေပိုင် စစ်ကောင်စီ၏ ကြည်း၊ ရီ၊ လီနန့် လာရောက်ပစ်ခတ်မှုအတွင်း လောင်းချောင်းရပ်ကွက်က ဒေသခံသက်ကြီးပိုင်းအမျိုးသားတယောက် ကျည်စ ထိမှန်၍ သီဆုံးခပနာအရွယ်မရောက်သိမ့်ရေ မမာ့ချေနှစ်ယောက်အပါအဝင် ညောင်ပင်လှကျေးရွာကအမျိုးသားတယောက်လည်း ဒဏ်ရာအပြင်းအထန်ရလားခရေလို့ သိရပါရေ။
ဒေရက်ပိုင်းတိအတွင်းမာစစ်ကောင်စီစွာ ညီနောင်မဟာမိတ် (၃) ဖွဲ့ကို ပြည်သူလူ ထုနန့်စိတ်ဝမ်းကွဲစီရေ သတင်းတု၊ သတင်းမှားတိလုပ်ကြံဖန်တီးပနာ ဖြန့်ချိနီစွာတိအပြင် စစ်ကောင်စီလက်ပါးစေအဖွဲ့တိက တဆင့်လည်း ပြည်သူလူထု အထင်အမြင်လွဲမှားစီရေ လုပ်ကြံမှုတိကို အယင်လုပ်နီကျအတိုင်း ပုံမှားရိုက် ပြု လုပ်လာစွာကို တွိရကြောင်း ညီနောင်မဟာမိတ်(၃)ဖွဲ့၏ ထုတ်ပြန်ချက်မာ ဖော်ပြထားဟိပါရေ။
