APM ၊ ဒီဇမ်ဘာ ၁၈ /၂၀၂၃
မောင်တောမြို့နယ်မာ ဒေနိ(ဒီဇမ်ဘာ ၁၈ ရက်နိ) မိုးထစောစော ၄ နာရီခွဲလောက်က တောဆင်ရိုင်း အနင်းခံရလို့ မူဆလင်အမျိုးသမီးတယောက် သီဆုံးလားကြောင်းသိရပါရေ။
သီဆုံးလားလူစွာ မောင်တောမြို့နယ်၊ရီတွင်းပြင်(မူဆလင်)ရွာက ဒေါ်စေဖန်ခါတူ (၆၀ နှစ်) ဖြစ်ပါရေ။
ဒေါ်စေဖန်ခါတူစွာ လင်ဖြစ်သူ ဦးဂနူရပ်မူဟာမောက်နန့်အတူ လယ်တဲမာ စပါးစောင့်အိပ်နီချိန် တောဆင်ရိုင်းတကောင် စပါးစားနီစွာကို ကြားလို့ ထွက်ကြည့်ခပါရေ။
ယင်းပိုင်ထွက်ကြည့်ချိန်မာ တောဆင်ရိုင်းက ဒေါ်စေဖန်ခါတူကို နှာမောင်းနန့် လိမ်ပနာ ပစ်ချလိုက်လို့ နီရာမာပင် ဂွင်းတိုင်း သီဆုံးလားစွာဖြစ်ပါရေ။
ကုန်ခရေ ဒီဇမ်ဘာ ၉ ရက်နိကလည်း မောင်တောမြို့နယ်က လယ်တဲမာ စပါးစောင့် အိမ်နီရေ ဒေသခံတယောက် တောဆင်ရိုင်းနင်းလို့ သီဆုံးလားခရပါသိမ့်ရေ။
မောင်တောမြို့နယ်မာ ဒေသခံတိစွာ ဒေဂုပိုင် တောဆင်ရိုင်းအန္တရာယ်ကို ရင်ဆိုင်နီရပြီးကေ မကြာမကြာ သီဆုံးမှုတိ ဟိနီပါရေ။
