APM ၊ နိုဗမ်ဘာ ၁၈ / ၂၀၂၃
မင်းပြားမာ နိုဗမ်ဘာ ၁၇ ရက်နိက စစ်ကောင်စီတပ်က ရည်ရွယ်ချက်ဟိဟိ လက်နက်ကြီးပစ်ခတ်လို့ အပြစ်မဲ့ပြည်သူ ၁ ယောက် သီဆုံးလားပနာ ၆ ယောက် ဒဏ်ရာပြင်းပြင်းထန်ထန်ရလားကြောင်း သိရပါရေ။
သီဆုံးလားလူစွာ မင်းပြားမြို့၊ အလယ်ပိုင်းရပ်ကွက်၊ မင်းကန်လမ်းက ဦးတင်အောင် (၇၂ နှစ်) ဖြစ်ပါရေ။
နိုဗမ်ဘာ ၁၇ ရက်နိ မိုးထ ၆ နာရီကျော်လောက်ကစပနာ ညည့် ၁၀ နာရီလောက်အထိ မင်းပြားအခြီစိုက် စစ်ကောင်စီတပ် ခမရ (၃၈၀) တပ်ရင်းက လက်နက်ကြီး အလုံးပေါင်း ၆၂ လုံးတိတိပစ်ခတ်ခပါရေ။
ယင်းနိ၊ညည့် ၈ နာရီကျော်လောက်က စစ်ကောင်စီတပ် ခမရ (၃၈၀) တပ်ရင်းကပစ်လိုက်တေ လက်နက်ကြီးကျည်တလုံး မင်းပြားမြို့၊ အလယ်ပိုင်းရပ်ကွက်ဟိ ဦးတင်အောင်၏ အိမ်နားသို့ကျရောက်ပေါက်ကွဲခပနာ ဦးတင်အောင်စွာ နီရာမာပင်ပွဲချင်းပြီး သီဆုံးလားကြောင်း မြို့ခံတိကဆိုပါရေ။
ယင်းအပြင် လက်နက်ကြီးကျည်စထိမှန်လို့ မင်းပြားမြို့၊ စျီးဟောင်းပိုင်း၊ မြို့သစ်ရပ်ကွက်က မအေးဝင်းမော် (၉ နှစ်)၊ မရှင်းသန့်သီရိ (၁၁ နှစ်)၊ ဒေါ်ဆွေဆွေသောင်း (၄၃ နှစ်)၊ ဒေါ်နုနုထွန်း (၄၆ နှစ်)၊ ဒေါ်ထွန်းဝင်းမေ (၇၈ နှစ်)နန့် မင်းပြားမြို့ ၊ ဥက္ကာပျံရပ်ကွက်က ဦးခင်မောင် (၅၂ နှစ်) ရို့မာလည်း ခန္ဓာကိုယ်အနှံ့ ဒဏ်ရာရလားရေလို့လည်း သိရပါရေ။
လက်ဟိ ဒဏ်ရာရလားခရေ လူတိကိုတော့ မင်းပြားဆီးရုံကြီးကို ပို့ဆောင်ဆီးကုသမှုခံယူလိုဟိကြောင်း သိရပါရေ။
ကုန်ခရေ နိုဗမ်ဘာ ၁၄ ရက်နိ ညည့်ကလည်း စစ်ကောင်စီတပ်၏ လက်နက် ကြီးနန့် ယမ်းသမ်းပစ်ခတ်မှုကြောင့် မင်းပြားမြို့နယ်၊ ဆင်ကြီးပြင်(မူဆလင်)ရွာက ရွာသား ၃ ယောက်သီဆုံးခပနာ ၈ ယောက် ပြင်းပြင်းထန်ထန် ဒဏ်ရာရလားခပါသိမ့်ရေ။
