APM၊ ဂျုန် ၁၇/၂၀၂၂
ဒေနိ (ဂျုန် ၁၇ ရက်နိ) မိုးထက ရသေ့တောင်မြို့နယ်မှာ စစ်ကောင်စီတပ် ထောင်ထားခသော စစ်လက်ကျန် မိုင်း တလုံး ပေါက်ကွဲမှုဖြစ်ပြီး ပြင်းပြင်းထန်ထန် ဒဏ်ရာရလားခသည့် ရသေ့တောင်ဒေသခံ လင်မယားနှစ်ယောက် သည် အဂုအချိန်မှာ စစ်တွေဆီးရုံ၌ ဆီးကုသမှုခံယူနီရသည်ဟု သိရသည်။
ဒဏ်ရာရလားခသည့် လင်မယားနှစ်ယောက်မှာ ရသေ့တောင်မြိုနယ်၊ အောင်ဗလရွာအုပ်စု၊ သာစည်ကုန်းရွာမှ ဦးအေးစိန်ထွန်း(၅၀ နှစ်) နန့် အေးစိန်နု(၄၇နှစ်) ရိုဖြစ်ပြီး ရွာနန့် ၆ ဖာလုံအကွာဟိ လယ်ကွင်းတွင် လယ်ထွန်းနီစဉ် ကန်းသင်းထက်မှာ စစ်ကောင်စီတပ်က မြှုပ်ထားခသည့် မိုင်းတလုံး ပေါက်ကွဲမှု ဖြစ်ပွားခခြင်းဖြစ်သည်။
ယင်းမိုင်းပေါက်ကွဲမှုဖြစ်စဉ်ကြောင့် ဦးအေးစိန်ထွန်းမှာ မျက်လုံးနှစ်ဖက်နန့်ခန္ဓာကိုယ်၌ထိခိုက်ဒဏ်ရာများရဟိခပြီး ဒေါ်အေးစိန်နု မှာလေ့ မျက်လုံးတဘက်နန့် ခန္ဓာကိုယ်၌ ထိခိုက်ဒဏ်ရာများရလားကာ ဒဏ်ရာပြင်းထန်၍ စစ်တွေ ဆီးရုံသို့ အရေးပေါ်ပို့ဆောင်လိုက်ရခြင်းဖြစ်ကြောင်း ရွာသားများက ပြောသည်။
သာစည်ကုန်းရွာတွင် အယင်တိုက်ပွဲကာလအတွင်းက ရွာနားသို့ စစ်ကောင်စီတပ်က ဖြတ်သန်းလားလာမှု၊ တပ်စွဲနီ ထိုင်မှု ဟိခသည့်အပြင် လက်ဟိအချိန်ထိလေ့ ယင်းရွာနားက တောင်ဦးတောင်နားမှာ စစ်ကောင်စီတပ်က တပ်စွဲ ထားသည်။
ကုန်ခသည့်ဂျုန် ၁၄ ရက်နိကလေ့ မြေပုံမြို့နယ် စညှင်းရွာ စစ်ဖီးယှောင်စခန်းမှ ဟင်းရှာလားသည့် စစ်ဖီးယှောင် အမျိုးသား၂ ယောက်မှာ စစ်ကောင်စီတပ် ထောင်ထားခသည့်မိုင်းကိုနင်းမိ၍ တယောက်သီဆုံးခပနာ တယောက် ဒဏ်ရာ ရလားခသည်။
ယင်းအပြင် မေ ၁၅ ရက်နိက မင်းပြားမြို့နယ် ပန်းမြောင်းရွာမှ ဦးအောင်သာထွန်း(၆၇ နှစ်)သည် သူ၏လယ်ကွင်း နားက တောစပ်မှာ စစ်ကောင်စီတပ် ထောင်ထားသော မြီမြှုပ်မိုင်းကိုနင်းမိ၍ပေါက်ကွဲမှုဖြစ်ပြီး အသက်သီဆုံးလား ခသည်။
ယင်းနည်းတူ မေ ၁၄ ရက်နိကလေ့ အမ်းမြို့နယ်၊ ဒါးလက်မြောက်ရွာနားဟိ သီဟိုဠ်သရက်ခင်းထဲမှာ တိုက်ပွဲ ကာ လအတွင်းက စစ်ကောင်စီတပ် ထောင်ထားခသည့် မြီမြှုပ်မိုင်းကို နင်းမိ၍ အသက် ၃၀ နှစ်အရွယ် ဦးသန်းမင်းနိုင် သီဆုံးခသည်။
မေ ၁၁ ရက်နိကလေ့ ကျောက်တော်အခြီစိုက်စစ်ကောင်စီတပ် ခမရ ၃၇၅ တပ်စခန်းပတ်ပတ်လည်မှာ ထောင်ထား သော မိုင်းများပေါက်ကွဲဖြစ်ပွားပြီး ယင်းပေါက်ကွဲမှုကြောင့် ခမရ ၃၇၅ အတွင်းမှာ ထိတ်လန့်မှုဖြစ်ကာ စစ်ကောင် စီတပ်ဖွဲ့ဝင် အချင်းအချင်း ပစ်ခတ်မှုတချို့ ဟိခသည်။
တပြည်လုံးအတိုင်းအတာအားဖြင့် အာဏာသျှင်တော်လှန်ရီးကို ရင်ဆိုင်နီရသော စစ်ကောင်စီတပ်အနီနန့် စစ်အင် အားမလုံလောက်မှုကို မိုင်းအမြောက်အမြားထောင်၍ ဖာထီးလျက် ဟိသည်။
ယင်းနည်းတူ ၎င်းရို့စခန်း၏အပြင်ဘက်၊ ၎င်းရို့လားလာလှုပ်ယှားသည့် နီရာများ၊ အများပြည်သူလားလာသည့် နီရာများ၊ ကျွဲ၊ နွားစားကျက်မြီများ၌ မြီမြှုပ်မိုင်း၊ နင်းမိုင်း၊ စွန့်လွှတ်မိုင်းများကို ထောင်ထားသောကြောင့် အရပ် သားများ မကြာ မကြာ မိုင်းနင်းမှုများဖြစ်ပေါ်လျက်ဟိသည်။
လယ်သမားများပိုင်ဆိုင်သည့် ကျွဲ၊ နွား သီဆုံးမှုများ၊ စစ်ကောင်စီတပ်မှ ထောင်ထားသော မြီမြှုပ်မိုင်း၊ စွန့်လွှတ်မိုင်း များ နင်းမိ၍ အရပ်သားများ ကိုယ်လက်အင်္ဂါ၊ အသက်ဆုံးယှုးမှုများလေ့ ဆက်တိုက် ဖြစ်ပေါ်လျက်ဟိသည်။
ဆင်းရဲနွမ်းပါးပြည်သူများ တဝမ်းတခါး ဝမ်းစာရှာဖွီသည့် တောတောင်များအစပ်၊တောတောင်များထဲ၌ မိုင်းထောင် ခြင်းများကိုစစ်ကောင်စီတပ်မှရည်ရွယ်ချက်ဟိဟိပြုလုပ်လျက်ဟိနီသောကြောင့် ဒေဂုပိုင် အရပ်သားများ ထိခိုက်၊ သီဆုံးမှု မြင့်တက်လျက်ဟိကြောင်း သိဟိရပါသည်။
Photo – Credit
