APM ၊ ဒီဇမ်ဘာ ၁၇ / ၂၀၂၃
ရက္ခိုင်ဒေသအတွင်း စစ်ကောင်စီတပ်နန့်ရက္ခိုင့်တပ်တော် ရို့အကြား နိုဗမ်ဘာ ၁၃ ရက်နိကစလို့တကျော့ပြန်တိုက်ပွဲ တိဖြစ်ပွားခါကပင် စစ်ကောင်စီတပ်စွာ ရက္ခိုင်ပြည်က အရပ်သားပြည်သူတိနီထိုင်ရာမြို့ရွာတိကို လက်နက်ကြီးတိနန့် နိစဉ်ရက်ဆက် ပစ်ခတ်နီခရေ နည်းတူ ဒေနိဒီဇမ်ဘာ ၁၇ ရက်နိမိုးထကလည်း စစ်ကောင်စီတပ်စွာ ရက္ခိုင်ပြည် မြို့နယ်တချို့ကရပ်ရွာတချို့သို့လက်နက်ကြီးတိနန့်ဆက်လက် ပစ်ခတ်နီခပါရေ။
စစ်ကောင်စီစွာ ဒေနိ ဒီဇမ်ဘာ ၁၇ ရက်နိ၊ မိုးထပိုင်းစလို့ပေါက်တော၊ရသေ့တောင်၊မောင်တော စရေမြို့နယ်တိက လူနီရပ်ရွာတိကို လက်နက်ကြီးတိနန့် ပစ်ခတ်ခစွာ ဖြစ်ပါရေ။ ဒေနိ မိုးထ ၉ နာရီ၊ မိနစ် ၃၀ လောက်က ပေါက်တောမြို့ နယ်မာ စစ်ကောင်စီ၏ ဇက်ရီယာဉ်(ဗျ)ကနီပနာ ဇီးချိုမော်ကျေးရွာဖက်သို့ လက်နက်ကြီး၊ လက်နက်ချေတိနန့် ယမ်းကား ပစ်ခတ်နီခပါရေ။
အလားတူယင်းစစ်ကောင်စီဇက်ရီယာဉ်(ဗျ) စွာ ဒီဇင်ဘာ ၁၆ ရက်နိ ညည့် ၁၀ နာရီလောက်ကလည်း မြင့်ဂါ၊ တောင်ဦးမော်နန့် ပြားသူကြွယ်ရွာတိကို လက်နက်ကြီးနန့် (၇) ကြိမ်ပစ်ခတ်ခပါသိမ့်ရေ။
ဒေနိ၊ နိခင်း ၁၁ နာရီ၊ မိနစ် ၃၀ လောက်ကလည်း ရသေ့တောင်အခြီစိုက် စစ်ကောင်စီတပ် ခမရ (၅၃၇) က လက်နက်ကြီးတိ နန့် (၅) ကြိမ် ပစ်ခတ်ခရာ ယင်းလက်နက်ကြီးကျည်တိစွာ ရသေ့တောင်မြို့နယ်၊ သဝင်ချောင်းရွာ ပျက်နားမာ ကျရောက် ပေါက်ကွဲခရေလို့ ဒေသခံတိက ပြောပါရေ။ တချိန်တည်းမာ ရသေ့တောင်မြို့နယ်၊ ဒုံးပိုက်ရွာနန့် ချိန်ခါလိန်ရွာကြား ပင်လယ်ပြင်ဟိစစ်ကောင်စီနေဗီတစီးက ပစ်ခတ်လိုက်တေ လက်နက်ကြီးကျည်တိလည်း ယင်းသဝင်ချောင်းရွာ ပျက်ဝန်းကျင်မာပင် ကျရောက်ပေါက်ကွဲခရေလို့ ဆိုပါရေ။
အလားတူ ဒေနိ၊ နိခင်း ၁၁ နာရီ၊ ၄၅ မိနစ်ကလည်း မောင်တောမြို့နယ်၊အင်းဒင်အခြီစိုက်စစ်ကောင်စီတပ် နခခ(၆) တပ်ရင်း ကလည်း အောင်သုခရွာနန့် ကိုးတန်ကောက်ရွာကြား မေယုတောင်တန်းသို့ လက်နက်ကြီး (၆)ကြိမ်တိုင်တိုင်ပစ်ခတ်ခရေလို့ ဒေသခံတိက ပြောပါရေ။
ရက္ခိုင်ပြည်မာ ရက္ခိုင့်တပ်တော် AA နန့် စစ်ကောင်စီတပ်အကြား တကျော့ပြန်တိုက်ပွဲတိ ပြန်ဖြစ်ခပြီး နောက်ပိုင်း အယှုံးနန့် ရင်ဆိုင်နီရရေ စစ်ကောင်စီစွာ အရပ်သားပြည်သူရိုကိုရာ ပစ်မှတ်ထား ဦးတည်တိုက်ခိုက်လျက်ဟိရာ စစ်ကောင်စီ ၏ ပစ်ခတ်တိုက်ခိုက်မှုတိကြောင့် နိုဗမ်ဘာ ၁၃ ရက်နိကနီ ဒေနိအထိ တလကျော်အတွင်း အရပ်သားပြည်သူ ၃၀ ထက်မနည်း သီဆုံးခရပြီးကေ ၁၀၀ နီးပါး ထိခိုက်ဒဏ်ရာရခပိုင် ဈီးအပါအဝင် နီအိမ် ၁၀၀၀ နီးပါး ပျက်စီးခရပါရေ။
