APM၊ ဒီဇမ်ဘာ ၁၆/ ၂၀၂၂
မန္တလေးမြို့တွင် ဒေနိ ဒီဇမ်ဘာ ၁၆ ရက်နိတရက်တည်း၌ငလျင် ၃ ကြိမ် လှုပ်လားကြောင်း သိရသည်။
ဒေနိ ဒီဇမ်ဘာ ၁၆ ရက်နိ မိုးထ ၆ နာရီ ၄၅မိနစ်ခန့်တွင် တကြိမ်၊နိခင်း ၁နာရီ ၃၀ မိနစ်ခန့်၌ တကြိမ်နန့်၂နာ ရီ ၃၀ မိနစ်ခန့်၌ တကြိမ် စုစုပေါင်း ၃ကြိမ်လှုပ်လားခကြောင်းမြို့ခံများ က ပြောသည်။
မိုးလီဝသနန့် ဇလဗေဒညွှန်ကြားမှုဦးစီးဌာနမှလေ့ ဒေနိ ဒီဇမ်ဘာ ၁၆ ရက် မိုးထ ၆နာရီ၄၅မိနစ်ခန့်တွင် ပြည်ကြီးတံခွန်မြို့၏ အရှိ တောင်ဖက်ကို ဗဟိုပြု၍ အင်အားရစ်ခ်ျတာစကေး (၃.၆)အဆင့်ဟိ ငလျင် (၁) ကြိမ်၊ နိခင်း ၁နာရီ ၃၀ မိနစ်ခန့်၌ မြစ်ငယ်မြို့၏အရှိဖက် ၃မိုင်အကွာကို ဗဟိုပြုသည့် အင်အားရစ်ခ်ျတာစကေး (၃.၃)အဆင့်ဟိ ငလျင် (၁) ကြိမ်၊ ၂နာရီ ၂၈မိနစ် အချိန်ခန့်၌ အမရပူရမြို့၏ အနောက်တောင်ဖက် ၃ မိုင်ခန့်အကွာကို ဗဟိုပြု၍ အင်အားရစ်ခ်ျတာစကေး (၄.၇) အဆင့်ဟိ ငလျင်(၁)ကြိမ် လှုပ်ခတ်လားကြောင်း ထုတ်ပြန်ထားသည်။
ပြီးခသည့် ဒီဇမ်ဘာ ၁၅ရက်နိကလေ့ မန္တလေးမြို့တွင် အင်အားရစ်ခ်ျတာစကေး( ၅. ၂) အဆင့်ဟိ မြီငလျင် တခုလှုပ်ခတ်ခသည့် အတွက် မန္တလေးနန့် စစ်ကိုင်းမှ ရှေးဟောင်းအဆောက်အဦးတချို့ ပြိုကျပျက်စီးခသည်။
