APM ၊ စပ်တမ်ဘာ ၁၆ /၂၀၂၃
ဒေနိ(စပ်တမ်ဘာ ၁၆ )ရက်နိ ရသေ့တောင်မြို့နယ်၊ ပန်းဖော်ပြင်အလယ်တန်းကျောင်းမာ တာဝန်ကျနီရေ အလယ်တန်းပြ ကျောင်းဆရာမတယောက် စာပြလားချိန်မာ အဓမ္မပြုကျင့်ခံရပြီးကေ လိုင်လှီး သတ်ဖြတ်ခံရရေလို့ သိရပါရေ။
မုဒိမ်းကျင်းပနာ ရက်ရက်စက်စက် လိုင်လှီးသတ်ဖြတ်ခံလိုက်ရသူမာ ရသေ့တောင်မြို့နယ်၊မယူကမ်း ကျွန်းပေါ် ပေါက်တော ရွာက အသက် ၂၇ နှစ်အရွယ် အလယ်တန်းပြဆရာမ ဒေါ်နှင်းယုနွယ် ဖြစ်ပါရေ။
ဆရာမဒေါ်နှင်းယုနွယ်စွာ သူနီထိုင်ရေ ကျွန်းပေါ်ပေါက်တောရွာကနီ သူတာဝန်ကျနီရေ ပန်းဖော်ပြင်ရွာ အလယ်တန်း ကျောင်းသို့ ပေါက်တော-ပန်းဖော်ပြင်လမ်းမကြီးအတိုင်း နိစဉ်နိတိုင်း စာပြဖို့လားနီစွာပါ။
ဒေနိ(စပ်တမ်ဘာ ၁၆ )ရက်နိ၊ မိုးထ ၉ နာရီ ဆရာမဒေါ်နှင်းယုနွယ်စွာ ပုံမှန်အတိုင်း ကျောင်းသို့ လမ်းလျှောက်လားရေခါ ယင်လမ်းထက်ဝက် ၁ မိုင်လောက်အကွာအရောက် မိုးထ ၉နာရီခွဲလောက် က အတင်းအကျပ်အဓမ္မပြုကျင့်ပနာ လူမဆန်စွာ ရက်ရက်စက်စက် လိုင်လှီးသတ် ဖြတ်ခံလိုက်ရကြောင်း သိရပါရေ။
ဆရာမ ဒေါ်နှင်းယုနွယ်၏ သီဆုံးနီရေရုပ်အလောင်းကို မိုးထ ၁၁ နာရီခွဲမာတွိခရပြီးကေ သက်ဆိုင်ရာတာဝန်ဟိလူတိက စုံစမ်းစစ်ဆီးမှုတိ အပူတပြင်း လုပ်နီကတ်တေလို့ သိရပါရေ။
Photo – Original Uploader
