APM ၊ ဂျူလိုင် ၁၆ /၂၀၂၃
မုန်တိုင်းကြောင်း စခန်းတခုလုံးပျက်စီးဆုံးယှုံးခရသည့် ကျောက်တော်မြို့နယ်၊သဲပုံစစ်ဖီးယှောင်စခန်းတွင် စားနပ်ရိက္ခာနန့် အမိုးအကာများအရေးတကြီး လိုအပ်နီကြောင်းသိရသည်။
ယင်းစစ်ဖီးယှောင်စခန်းတွင် အိမ်ထောင်စု ၃၈ စု နန့် လူဦးရေ ၁၇၁ ယောက်နီထိုင်လျက်ဟိပြီး မေ ၁၄ ရက်နိက တိုက်ခတ်ခ သည့် Mocha ဆိုင်ကလုန်းမုန်တိုင်းကြောင့် ယင်းစခန်းဟိ ယာယီလူနီအိမ်များ အားလုံးပျက်စီးခရသည်။
မုန်တိုင်းတိုက်ခတ်ပြီး နှစ်လကျော်လာသည့်တိုင် လက်ဟိအချိန်ထိ ယင်းစခန်း၌ နီအိမ်များကို ပြန်မပျင်နိုင်သိမ့်၍ အိမ်အပြို အပျက်များကြားမှ သုံး၍ရသည်များ ပြန်သုံးကာ ယာယီတဲထိုးလျက် ကုပ်ကပ်နီထိုင်နီကတ်ရသည်။
မုန်တိုင်းကြောင့်ပျက် စီးလားသည့် နီအိမ်ကို ပြုပျင်နီရသည့်ကြားထဲ အကူအညီများရဟိမှုလေ့ နည်းပါးနီကာ တချို့မိသားစု များမှာ မလောက်မငှစားသောက်နီကတ်ရပြီး စားသောက်ရီးလေ့ အခက်ကြုံနီကတ်ရသည်ဟု ဆိုသည်။
ယင်းကြောင့် နီအိမ်များပြန်လည်တည်ဆောက်ရန် အမိုးအကာ နန့်တခြားဆောက်လုပ်ရီးပစ္စည်းများ အရေးတကြီးလိုအပ် နီကြောင်း စစ်ဖီးယှောင်များပြောကြားချက်အရ သိရသည်။
ယင်းအပြင် လက်ဟိအချိန်ထိ အရေးပေါ်အကူညီလာရောက် ပီးအပ်သည်များနည်းပါးနီ၍ စားနပ်ရိက္ခာများ ပြတ်လပ်ကာ စားသောက်ရီးအခက်အခဲများလေ့ ဆိုးဆိုးဝါးဝါးကြုံနီကတ်ရကြောင်း သိရသည်။
