APM ၊ မေ ၁၆ /၂၀၂၄
ရသေ့တောင်မြို့နယ်မာ မေ ၁၅ ရက်နိ၊မိုးထပိုင်းက အကြမ်းဖက်စစ်ကောင်စီတပ်ထောင်ထားခရေ လက်ကျန် မိုင်းတလုံးကိုနင်းမိရာက ပေါက်ကွဲမှုဖြစ်ခလို့ ဆယ်ကျော်သက်အရွယ်အမျိုးသားတယောက်သီဆုံးလားပြီးကေ၊ နှစ်ယောက် ထိခိုက်ဒဏ်ရာ ရလားရေလို့ သိရပါရေ။
သီဆုံးလားရေလူစွာ ရသေ့တောင်မြို့နယ်၊ကျောင်းတန်းရွာက ကိုခင်မောင်သန်း(၁၆ နှစ်)ဖြစ်ပြီး၊ ဒဏ်ရာရလားခလူတိကတော့ ကိုအောင်မိုးဦး (၁၈ နှစ်)နန့် ကိုစိုးတင်သန်း(၁၆ နှစ်)ရို့ဖြစ်ပါရေ။
ဖြစ်စဉ်မာ ကိုခင်မောင်သန်း၊ကိုအောင်မိုးဦးနန့်ကိုစိုးတင်သန်းရို့စွာ မေ ၁၅ ရက်နိ၊ မိုးထ ၉ နာရီ ၄၅ မိနစ်လောက်က သူရို့နီထိုင်ရေကျောက်တန်းရွာကနီ ကံပြင်ရွာသို့လားကတ်ရာ ၎င်းရွာဟိစာသင်ကျောင်းနားသို့အရောက် ကားလမ်းဘေးမာ အယင်ကအကြမ်းဖက်စစ်ကောင်စီတပ်ထောင်ထားခရေ လက်ကျန်စွန့်လွှတ်မိုင်းတလုံးကို ကိုခင်မောင်သန်းနင်းမိရာမှ ပေါက်ကွဲမှုဖြစ်ပွားခစွာလို့ သိရပါရေ။
ယင်းသို့မိုင်းပေါက်ကွဲမှုကြောင့် ကိုခင်မောင်သန်းမာ ဘယ်ခြီထောက်ပြတ်ထွက် ၊ညာခြီထောက်နန့်အမျိုးသားအင်္ဂါစပ်ရို့မာ ပြင်းထန်ဒဏ်ရာရဟိလားခပြီး၊ ကိုအောင်မိုးဦးနန့် ကိုစိုးတင်သန်းမာလည်း မိုင်းစထိမှန်ပနာ ထိခိုက်ဒဏ်ရာရလားရေလို့ ဒေသခံတိက ပြောပါရေ။
ယင်းနောက် သူရို့သုံးယောက်ကို ဆီးကုသမှုခံယူဖို့ ဆီးရုံသို့ အရေးပေါ် ပို့ဆောင်ခကေလေ့၊ ကိုခင်မောင်သန်းကတော့ ဆီးကုသမှုနီစဉ်အတွင်း ဆုံးပါးလားကြောင်း သိရပါရေ။
