APM၊ မာ့ချ် ၁၅ /၂၀၂၄
ရသေ့တောင်မြို့နယ်မာ ရက္ခိုင့်တပ်တော်နန့် အကြမ်းဖက် စစ်ကောင်စီတပ်ရို့ကြား တိုက်ပွဲတိ ဆက်လက်ပြင်းထန်နီရေလို့ ရက္ခိုင့်တပ်တော်(AA)က မာ့ချ် ၁၅ ရက်နိမာ ထုတ်ပြန်ပါရေ။
ရက္ခိုင့်တပ်တော်၏ ထုတ်ပြန်ချက်အတွင်း “ရသေ့တောင်မြို့အခြီစိုက်တပ်ရင်းတိဖြစ်တေ ခမရ (၅၃၆)၊ (၅၃၇) နန့် (၅၃၈) ရို့ကို ရန်သူ၏ ကြည်း၊ ရီ၊ လီပစ်ကူတိအမြောက်အမြားနန့်အပြင်းအထန်ခုခံနီရေကြားက၂၀၂၄ ခုနှစ်၊ မာ့ချ်လ (၁၅) ရက်နိမာလည်း အဆိုပါ စခန်းတိကို ရက္ခိုင့်တပ်တော်က အယှိန်အဟုန်မြှင့် ဆက်လက်ထိုးစစ်ဆင် တိုက်ခိုက်နီရေ” လို့ ဖော်ပြထားပါရေ။
အကြမ်းဖက် စစ်ကောင်စီစွာ ရသေ့တောင်မြို့မကျစီရီးအတွက် လီကြောင်း၊ ရီကြောင်း ပစ်ကူတိအပြင် စစ်တွေမြို့အခြီစိုက် အမှတ် (၁၂) ရဲတပ်ရင်း၊ စစ်တွေမြို့နယ်၊ ပါဒလိတ်အခြီစိုက် ခမရ (၃၄၄) နန့် ခမရ (၂၃၂)၊ ကြွီတဲပိုက်ဆိပ်၊အမြင့်ကျွန်းရဲစခန်းရို့ကနီ လက်နက်ကြီးတိ၊ အတွဲလိုက်ဒုံးတိနန့်ပါ အလူးအလဲ အသည်းအသန်း ခုခံကာကွယ်နီရရေလို့ သိရပါရေ။
ရက္ခိုင့်တပ်တော်ဖက်ကလည်းရသေ့တောင်အပြင်ဘူးသီးတောင်၊မောင်တောမြို့တိမာဟိရေ ရန်သူ့လက်ကျန်စခန်း အချို့ကို အယင်ရက်တိနည်းတူ ပြင်းပြင်းထန်ထန် ဆက်လက် ထိုးစစ်ဆင်တိုက်ခိုက်နီရေလို့ သိဟိရပါရေ။
