APM ၊ ဒီဇမ်ဘာ ၁၆ / ၂၀၂၃
ဂျပန်-အာဆီယံအကြား ဆက်ဆံရီးနှစ် (၅၀) ပြည့်အထိမ်းအမှတ် ထိပ်သီးအစည်းအဝေးကို ဂျပန်နိုင်ငံ၊ တိုကျိုမာ ဒေနိ ( ဒီဇမ်ဘာ ၁၆ ရက်နိ)၊ ညဇာပိုင်းက စတင်ကျင်းပနီကြောင်း သိရပါရေ။
(၃) ရက်ကြာ ကျင်းပပြုလုပ်လားဖို့ဖြစ်တေ အဆိုပါထိပ် သီးအစည်းအဝေးကို ဒေနိညဇာပိုင်းက ဧည့်ခံပွဲနန့်စတင်ခပြီးကေ ဂျပန် ဝန်ကြီးချုပ်ဖူမီယိုကီချီဒက အဖွင့်မိန့်ခွန်း ပြောကြားခပါရေ။
ဂျပန်ဝန်ကြီးချုပ်က “ဂျပန်နန့်အာဆီယံကြား ဆက်ဆံရီး ပိုလို့ခိုင်မာဖို့နန့် ပူးပေါင်းဆောင်ရွက်မှုတိ လုပ်လားကတ်ဖို့” ထည့်သွင်းပြောကြားခပါရေ။
ဂျပန်ဝန်ကြီးချုပ်ရေ တိုကျို မာ ရောက်နီကတ်တေ အာဆီယံဂေါင်းဆောင်တိနန့် သီးခြားစီတွိဆုံပနာ နှစ်နိုင်ငံ အရေးအရာ ကိစ္စရပ်တိအပြင် ဒေသတွင်းနန့် နိုင်ငံတကာ စိန်ခေါ်မှုတိကို အမြင်ချင်းဖလှယ် ဆွေးနွေးခကတ်တေလို့လည်း ဂျပန်နိုင်ငံခြားရီးဝန်ကြီးဌာနက သတင်းထုတ်ပြန်ပါရေ။
အငြင်းပွားနီရေ တောင်တရုတ်ပင်လယ် နယ်မြီပိုင်ဆိုင်မှုအတွက် တရုတ်က အင်အားချဲ့ထွင်စွာတိလုပ်နီရေအချိန် အာဆီ ယံနိုင်ငံတချို့ကို ကူညီဖို့အတွက် တရားဝင်လုံခြုံရီးအကူအညီ (OSA) ခေါ် လုံခြုံရီးပူးပေါင်းဆောင်ရွက်မှု မူဘောင် အောက်ကနီ ကာကွယ်ရီးပစ္စည်းတိကို ထောက်ပံ့ပီးလားဖို့လို့လည်း ဝန်ကြီးချုပ်က ဆိုပါရေ။
ဂျပန်နန့် အာဆီယံခေါင်းဆောင်တိရေ အဓိကဆွေးနွေးမှုတိကို ဒီဇမ်ဘာ ၁၇ ရက်နိမာစတင်ဖို့ဟိပြီး ဒေသတွင်းပြဿနာတိ နန့် ကမ္ဘာလုံးဆိုင်ရာ စိန်ခေါ်မှုတိကို ဆွေးနွေးဖို့ဟိနီပါရေ။
အဂု ကျင်းပနီရေ ဂျပန်-အာဆီယံ ထိပ်သီးအစည်းအဝေးသို့ အာဆီယံအဖွဲ့ဝင်ဖြစ်တေ မြန်မာပြည်ကိုတော့ တက်ရောက်ဖို့ မဖိတ် ကြားခလို့ သိဟိရပါရေ။
Source – Japan-ASEAN Summit Starts in Tokyo
Photo Jiji Press
