APM၊ ဩဂတ်စ် ၁၅/ ၂၀၂၃
အိန္ဒိယနိုင်ငံမြောက်ပိုင်း ဟီမာချယ် ပရာဒတ်ချ်ပြည်နယ်နန့် အက်ထရာခန်ပြည်နယ်ရို့တွင် ဩဂတ်စ် ၁၃ရက်နိ ညည့်ကနီ ၁၄.ရက်နိညည့်အထိ တရက်အတွင်း မိုးကြီးမြီပြိုမှုများကြောင့် သီဆုံးလူ ၅၅ ယောက်ထက်မနည်းဟိကြောင်း သိရသည်။
ဟီမာချယ် ပရာဒတ်ချ်ပြည်နယ် ချိန်းမလားမြို့၌ မြီပြိုမှု ၂ခုကြောင့် လူ ၁၄ ယောက်အပါအဝင် ဟီမာချယ် ပရာဒတ် ပြည်နယ်တခုတည်း၌ စုစုပေါင်းလူ ၅၁ ယောက်သီဆုံးခကြောင်း ဟီမာချယ် ပရာဒတ်ချ်ပြည်နယ် ဝန်ကြီးချုပ် ဆုခ်ဘင်ဒါဆင်းဂ်ဆူခူက ဆိုသည်။
လက်ဟိတွင် ပိတ်မိနီသူ အယောက် ၂၀လောက်ဟိနီပြီး အသီအပျောက်တိုးလာရန် အလားအလာဟိကြောင်း၊ ရှာဖွီကယ်ဆယ်ရီး လုပ်ငန်းများကို ဆက်လက်ကြိုးပမ်းဆောင်ရွက်လျက်ဟိကြောင်း ဝန်ကြီးချုပ်က ဆက်လက်ပြောကြားသည်။
အလားတူ အက်ထရာခန်ပြည်နယ်တွင်လေ့ မိုးသည်းထန်စွာရွာသွန်းမှုကြောင့် မြီပြိုမှုများဖြစ်ပွားခရာ နီပေါ နိုင်ငံသားတယောက် အပါအဝင် လူ ၄ ယောက်သီဆုံးခပြီး ၉ယောက် ပျောက်ဆုံးနီကြောင်း ဒေသအာဏာပိုင်များက ထုတ်ပြန်ထားသည်။
အဆိုပါပြည်နယ်နှစ်ခုစလုံးတွင် မိုးကြီးမြီပြိုမှုများကြောင့် အဝီးဗြီးလမ်းများ၊ မီးရထားလမ်းများပျက်စီးမှုများဖြစ်နီရာ ခရီးလား လာရီးကို ဖျက်ထားရပြီး စာသင်ကျောင်းနန့် ကောလိပ်များကို ပိတ်ထားရကြောင်း သိရသည်။
အိန္ဒိယ မိုးလီဝသဌာန (IMD) က နောက်တရက်အထိ ဟီမာချယ် ပရာဒတ်ချ်ပြည်နယ်နန့် အက်ထရာခန်ပြည်နယ်ရို့တွင် မိုးပြင်းပြင်းထန်ထန်ရွာသွန်းမည်ဟု ခန့်မှန်းထားပြီး ပြည်နယ်နှစ်ခုစလုံးအတွက် အနီရောင်သတိပီးချက်ထုတ်ပြန်းသည်။
Source – 51 killed in Himachal rains, 14 of them in Shimla landslides4 killed, 9 missing as heavy rains lash Uttarakhand
Photo AP
