
APM၊ ဩဂတ်စ် ၁၅/ ၂၀၂၃
ကချင်ပြည်၊ ဖားကန့်မြို့နယ်၊ မနမှော်ဟိ လုပ်ကွက်ဟောင်းတခု၌ မြီစာပုံပြိုကျမှုအတွင်း ပျောက်ဆုံးနီသည့် ရီမဆီးကျောက်ရှာသမားများထဲမှ လူ ၂၂ ယောက်၏ ရုပ်အလောင်းများကို ဒေနိ (ဩတ်စ် ၁၅ ရက်နိ)၊ ညဇာပိုင်းအထိ ကယ်ဆယ်ရီးလုပ်ဆောင် နီလူများက ပြန်လည်ရှာတွိခကြောင်း သိရသည်။
မနမှော်မြောက်ဖက်ဟိ ဖုန်းတာဝါတိုက်အောက်မှ ကုမ္ပဏီလုပ်ကွက်ဟောင်းနီရာတွင် ဩဂတ်စ် ၁၃ ရက်နိ၊ မွန်းလွဲ ၃နာရီ လောက်က ကျောက်တူးနီစဉ် အထက်မှ ကမ်းပါးပြိုကျ၍ ရီမဆီးသမားအများအပြား မြီစာပုံပိကာ ပျောက်ဆုံးနီရာ တရက်အကြာ တွင် ပုပ်ပွနီသည့် ရုပ်အလောင်းများကို ပြန်လည်တွိဟိခခြင်းဖြစ်သည်။
မြန်မာပြည်လူမှုကယ်ဆယ်ရီးအဖွဲ့(ဖားကန့်) က လက်ဟိအချိန်အထိ မြီပြိုမှုအတွင်း ပျောက်ဆုံးသတင်းပီးပို့ထားသည့်လူ ၄၀ ကျော် ဟိပြီး ယင်းအထဲမှ သီဆုံးနီသည့် လူ ၂၂ ယောက်၏ ရုပ်အလောင်းများကို ရှာတွိထားကြောင်း ပြောကြားသည်။
မြီစာပုံပြိုကျမှုအတွင်း ပျောက်ဆုံးနီသည့် လူများကို ကယ်ဆယ်ရီးဝန်ထမ်းများက ရှာဖွီနီသိမ့်ပြီး တခြားထိခိုက်ဒဏ်ရာရလူ ၈ယောက်လောက်ကိုလေ့ ဆီးရုံသို ပို့ဆောင်ထားခရသည်။
ဖားကန့်ဒေသတွင် နှစ်စဉ်မိုးရာသီတွင် မြီပြိုကျမှုကြောင့် လူသီဆုံးမှုများဟိနီပြီး ၂၀၂၂ ခုနှစ်၊ ဖေဖော်ဝါရီလက မက်လင်ဂျောင် ရွာတွင် ကျောက်တူးဖော်ရီးလုပ်ကွက်၌ မြီပြိုမှုကြောင့် လူပေါင်း ၈၀ နီးပါး သီဆုံးခသည်။
အလားတူ ကုန်ခသည့် ၂၀၂၀ခုနှစ်ကလေ့ ဝှေခါမှော်ဟိ ကျောက်စိမ်းလုပ်ကွက်တခုတွင် မြီပြိုကျမှုကြောင့် လူပေါင်း ၁၇၀ ကျော် သီဆုံးခရသိမ့်သည်။
Photo မြန်မာပြည်လူမှုကယ်ဆယ်ရီးအဖွဲ့(ဖားကန့်)


