APM ၊ ဂျူလိုင် ၁၅ /၂၀၂၃
Mocha ဆိုင်ကလုန်းမုန်တိုင်းတိုက်ခတ်ပြီး နှစ်လကြာလာသည့်တိုင် ရက္ခိုင်ကျေးရွာအများအပြားမှ စာသင်ကျောင်းများမှာ အဂုချိန်ထိ မပြုပျင်နိုင်သိမ့်၍ ကျောင်းသား/ ကျောင်းသူများ စာသင်ကြားရန် အခက်ကြုံနီကတ်ရကြောင်း သိရသည်။
မုန်တိုင်းကြောင့် စစ်တွေမြို့နယ်၊ ရသေ့တောင်မြို့နယ်၊ ပုဏ္ဏားကျွန်းမြို့နယ်၊ ပေါက်တောမြို့နယ်နန့် ကျောက်တော်မြို့နယ် များမှ ကျေးလက်ဒေသဟိ စာသင်ကျောင်းအများအပြား ပျက်စီးခရသည်။
ယင်းအထဲ လုံးဝ ပြိုပျက်လားသည့် စာသင်ကျောင်းအများစု၌ လက်ဟိအချိန်ထိ ပြန်မပျင်နိုင်သိမ့်၍ ကျောင်းသား/ ကျောင်းသူ များ ကျောင်းစာသင်ယူခွင့်မရဖြစ်နီကတ်သည့်အပြင် လုံးဝ ကျောင်းပြန်မဖွင့်ရသိမ့်သည့် ကျောင်းများလေ့ ဟိကြောင်း ကျောင်းသားမိဖများက ပြောသည်။
ခေါင်မိုးများမဟိသည့် စာသင်ကျောင်းဆောင်များတွင် တာပေါ်လင်စများဖြင့် ယာယီမိုးကာစာသင်နီကတ်ရပြီး တချို့ ဘုန်းကြီးကျောင်းများ၊ ဓမ္မာရုံများနန့် ဇရပ်များ၌ အချိန်ခွဲ၍ စာသင်ကြားနီကတ်ရသည်လေ့ ဟိသည်။
မေလ ၁၄ ရက်က တိုက်ခတ်ခသည့် Mocha ဆိုင်ကလုန်းမုန်တိုင်းကြောင့် ရက္ခိုင်တွင် အခြီခံပညာစာသင်ကျောင်းပေါင်း ၁၀၀၀ ကျော် ဆိုးဆိုးဝါးဝါး ပျက်စီးခရပြီး၊ အဆိုပါစာသင်ကျောင်းများအား ပြန်ပြုပျင်ရန် အကူအညီအရေးတကြီး လိုအပ်နီကြောင်း သိဟိရသည်။
