APM ၊ မာ့ချ် ၁၅ / ၂၀၂၄
မာန်အောင်မြို့နယ်မာ ဒေရက်ပိုင်းအတွင်း အကြမ်းဖက်စစ်ကောင်စီက စစ်မှုထမ်းဖို့အတွက် တရွာတယောက်ကျ မဖြစ်မနီ ပီးရဖို့လို့ တောင်းနီကြောင်းသိရပါရေ။
အကြမ်းဖက်စစ်ကောင်စီ၏ မာန်အောင်မြို့နယ် အုပ်ချုပ်ရီးမှူး မင်းသူဟိန်းက ၎င်းရို့ခန့် ရပ်ကျေးအုပ်ချုပ်ရီးမှူးတိကို ခေါ်ယူပနာ အကြမ်းဖက်စစ်ကောင်စီဘားမာ စစ်မှုထမ်းဖို့အတွက် တရွာကို အသက် ၂၄ နှစ်မှ ၃၀ ကြားအရွယ် လူငယ်တယောက်စီ ပီးရဖို့လို့ပြောကြားခရေလို့ ဆိုပါရေ။
ယင်းအပြင် မာ့ချ်လအစပိုင်းကစလို့ မာန်အောင်မြို့နယ်၊ ပြင်ကောက်ရွာနားက ကြေးမုံတောင်မာ တပ်စွဲထားရေ အကြမ်းဖက်စစ်ကောင်စီတပ်ဖွဲ့ဝင်တိနန့် မာန်အောင်ကျွန်း မျှော်တော်ဦးရီတပ်စခန်းက အကြမ်းဖက်စစ်ကောင်စီတပ်ဖွဲ့ဝင်တိကလည်း အုပ်စုလိုက် အရပ်ဝတ်တိဝတ်လို့ သီနတ်တိကိုင်ဆောင်ပနာ အပါးဟပ်စပ်က ရပ်ရွာတိကို ရွာစဉ်တိုင်း ဝင်ရောက်စစ်ဆီးစွာ၊ ရွာနားမာ ကင်းပုန်းဝပ်စွာ၊ မိုင်းထောင်စွာတိ ပြုလုပ်လာရေလို့လည်း ဒေသခံတိပြောကြားချက်အရ သိရပါရေ။
