APM ၊ မာ့ချ် ၁၅ / ၂၀၂၄
ဒေနိ မာ့ချ် ၁၅ ရက်နိ၊ မိုးထ ၁၀ နာရီလောက်က မြောက်ဦးမြို့နယ်မာ အကြမ်းဖက်စစ်ကောင်စီ၏ လက်နက်ကြီးပစ်ခတ်မှုကြောင့် ဆယ်ကျော်သက်အရွယ်အမျိုးသမီးချေ တယောက် သီဆုံးလားပြီးကေ ၄ နှစ်အရွယ်အချေ တယောက် ဒဏ်ရာရလားရေလို့ သိရပါရေ။
သီဆုံးလားလူစွာ မြောက်ဦးမြို့နယ်၊ ရွာဟောင်းတောရွာက မခိုင်လှကြည်(ခ)ဘုမ (၁၆နှစ်)နန့် ဒဏ်ရာရလားရေ အချေမာ တရွာတည်းနီ အဖ ဦးစိုးဝင်း၊ အမိ ဒေါ် ခင်မိုးရီရို့၏ သား မောင်ညီလင်းခိုင် ( ၄ နှစ်) ဖြစ်ပါရေ။
ဒေနိ မိုးထ ၁၀ နာရီလောက်မာ စစ်တွေအခြီစိုက် အကြမ်းဖက်စစ်ကောင်စီရီတပ်စခန်းက အတွဲလိုက်ဒုံးတိနန့် မြောက်ဦးမြို့ကို ဦးတည် ယမ်းကားပစ်ခတ်ခပါရေ။
ယင်း အတွဲလိုက်ဒုံးတိစွာ မြောက်ဦးမြို့နယ်၊ ရွာဟောင်းတောရွာနား၊ ပီပင်ကုန်းရွာနား၊ သင်းကျိတ်တော်စေတီနားနန့် လက်ဆည်ကန်တောင်ဖက်နားရို့မာ ကျရောက်ပေါက်ကွဲခရေလို့ ဒေသခံတိကပြောပါရေ။
ရွာဟောင်းတောရွာနားမာကျရောက်ပေါက်ကွဲခရေ လက်နက်ကြီးကျည်ကြောင့် ယင်းအနားမာဟိရေ မခိုင်လှကြည်၏ ဦးဂေါင်းမာ ကျည်စကျပနာ နီရာမာပင်ပွဲ ဂွင်ချင်း သီဆုံးလားခရေပိုင်၊ မောင်ညီလင်းခိုင်၏ ဘယ်ဖက်ခြီသလုံးမာလည်း ဒဏ်ရာရလားရေလို့ ဆိုပါရေ။
လက်ဟိမာ ဒဏ်ရာရလားရေ မောင်ညီခိုင်လင်းစွာ အရေးပေါ် ဆီးကုသမှုခံယူနီရကြောင်း သိဟိရပါရေ။
