
APM ၊ ဖေဖော်ဝါရီ ၁၅ / ၂၀၂၃
မြောက်ဦးမြို့ဟိ ဒိုင်းကျီ(ကျောင်းသစ်)စစ်ဖီးယှောင်စခန်းတွင် စားနပ်ရိက္ခာများနန့် မီးဖိုချောင်သုံးပစ္စည်းများ အရေးတကြီး လိုအပ်နီကြောင်း သိရသည်။
ယင်းစစ်ဖီးယှောင်စခန်းတွင် ကုန်ခသည့် ၂၀၁၈-၂၀၁၉ ခုနှစ်ကာလက ရက္ခိုင့်တပ်တော်(AA)နန့် မြန်မာစစ်တပ်ရို့ တိုက်ပွဲများပြင်းထန်ချိန်မှစ၍ မြောက်ဦးမြို့နယ် ဘောင်းတပ်၊ တိမ်ညိုစသည့်ကျေးရွာများနန့် မြေပုံမြို့နယ် ရွာသာယာ၊ ကျွဲကူးဆိပ် စသည့်ကျေးရွာများမှ ဒေသခံများ လာရောက်ခိုလှုံလျက်ဟိသည်။
လက်ဟိတွင် ယင်းစစ်ဖီးယှောင်စခန်း၌ စားနပ်ရိက္ခာများနန့် အခြီခံစားသောက်ကုန်ပစ္စည်းများပြတ်လပ်နီ၍ စစ်ဖီးယှောင်များ အတိဒုက္ခရောက်နီကတ်ရသည်ဟု စခန်းတာဝန်ခံက ပြောသည်။
ယင်းစစ်ဖီးယှောင်စခန်းကို ကုန်ခသည့် ဂျန်နဝါရီလ၌ WFP မှ လူတယောက်ကို တရက်စားစရိတ်ငွေ ၇၀၀ ကျပ်စီ ၂ လစာထောက်ပံ့ပီးခသည်ဟုဆိုသည်။
ယင်းအပြင် အဆိုပါဒိုင်းကျီ(ကျောင်းသစ်) စစ်ဖီးယှောင်စခန်းဟိ စစ်ဖီးယှောင်များ အသုံးပြုနီကတ်သည့် မီးဖိုချောင်သုံးပစ္စည်းများမှာလေ့ ဟောင်နွမ်းပျက်စီးနီ၍ မီးဖိုချောင်သုံးပစ္စည်းများလေ့ အရေးတကြီးလိုအပ်နီ သည်။
လက်ဟိတွင် မြောက်ဦးမြို့ဟိ ဒိုင်းကျီ(ကျောင်းသစ်)စစ်ဖီးယှောင်စခန်းတွင် အိမ်ထောင်စု ၆၂ စုနန့် လူဦးရေ ၂၁၈ ယောက် ခိုလှုံလျက်ဟိကြောင်း သိဟိရပါသည်။

