
APM ၊ ဒီဇမ်ဘာ ၁၅ / ၂၀၂၃
ဒေနိ(ဒီဇမ်ဘာ ၁၅ ရက်နိ) မိုးထ ၁၁ နာရီမာ စစ်တွေမြို့က အရပ်သားပြည်သူ ၃ ယောက်ကို လက်နက်အပြည့်အစုံ ကိုင်ဆောင်ထားရေ စစ်ကောင်စီတပ်ဖွဲ့ဝင်တိက နီအိမ်သို့ ဝင်ရောက်ဖမ်းဆီးလားခကြောင်း ညီနောင်မဟာမိတ်(၃) ဖွဲ့ ထုတ်ပြန်ပါရေ။
ထုတ်ပြန်ချက်အရ “၂၀၂၃ ခုနှစ်၊ ဒီဇမ်ဘာ (၁၅) ရက်နိ၊ မိုးထ ၁၁ နာရီအချိန်လောက်မာစစ်ကောင်စီတပ်ဖွဲ့ဝင်တိစွာ ရက္ခိုင် ပြည်၊ စစ်တွေမြို့က ဒေသခံ (၃) ဦးကို လက်နက်အပြည့်အစုံကိုင်ဆောင်ပနာ နီအိမ်သို့ ဝင်ရောက်ဖမ်းဆီးလာခပါရေ လို့ ဖော်ပြထားပါရေ။
အလားတူပင် ဒေနိ ညဇာ ၄ နာရီ ၂၀ မိနစ်ကလည်း မောင်တောမြို့ဟိ သမဝါယမနန့်ကျေးလက်ဖွံ့ဖြိုးရီးဌာနမာ တာဝန် ထမ်းဆောင်နီရေ ဒု-ဦးစီးတယောက်နန့် အထက်တန်းစာရေး နှစ်ယောက်ကို အင်အား ၁၂ ယောက်လေယင်ပါရေ စစ်ကောင်စီ တပ်ဖွဲ့ဝင်တိက အင်အားသုံးပနာ ရုံးအတွင်းသို့ ဝင်ရောက်ဖမ်းဆီးခရေလို့ ဆိုပါရေ။
ယင်းအပြင် မင်းပြားမြို့မာလည်း မြို့မရဲစခန်းအနောက်ဖက်ဟိ ပြည်သူသုံးသောက်ရီကန်တကန်မာ စစ်ကောင်စီတပ်ဖွဲ့ ဝင်တိ ထောင်ထားခရေစွန့်လွှတ်မိုင်းကို ဒေနိမိုးထပိုင်းက ဒေသခံတယောက် နင်းမိခလို့ ခြီထောက်နှစ်ဖက်လုံး ပြတ်တောက် ခရရေလို့ သိရပါရေ။
ယင်းနည်းတူ ရက္ခိုင်ပြည်သူလူထုကို လက်နက်ကြီးတိနန့် ပစ်ခတ် ခြောက်လှန့်ပနာ နှစ်ရှည်လများ ဒုက္ခပီးလာခရေ စစ်ကောင်စီတပ်ရင်းတိထဲက တခုအပါအဝင်ဖြစ်တေ မောင်တောမြို့၊ မြို့သူကြီးအခြီစိုက် စစ်ကောင်စီလက်အောက်ခံ နခခ (၅) တပ်ရင်းကလည်း ဒေနိနိခင်း ၂ နာရီအချိန်လောက်မာ မောင်တောမြို့နယ်ဟိကျေးရွာအချို့က ဒေသခံရွာသားတိကို လက်နက်ကြီးနန့် ပစ်ခတ်ခြောက်လှန့်ပနာ ရွာထဲကနီ အင်အားသုံး အဓမ္မနှင်ထုတ်ခရေလို့ ဆိုပါရေ။
ယင်းနခခ (၅) တပ်ရင်းကနီ ဒေနိညဇာ ၅ နာရီ ၃၀ မိနစ်လောက်မာ ရည်ရွယ်ချက်ဟိဟိနန့် ပစ်ခတ်လိုက်တေလက်နက်ကြီး ကျည်တိထဲက (၃) လုံးစွာ ကံပြင်သာစည်ရွာနန့်ရွာသာယာကြားသို့ ကျရောက် ပေါက်ကွဲခပြီးကေ ရွာသာယာရွာက ဒေသခံအမျိုးသမီးတယောက် ကျည်စထိမှန်ပနာ ထိခိုက်ဒဏ်ရာရဟိခကြောင်းလည်း ညီနောင်မဟာမိန် (၃) ဖွဲ့၏ ထုတ်ပြန်ချက်မာ ဖော်ပြထားပါရေ။
