APM ၊ နိုဗမ်ဘာ ၁၅ /၂၀၂၃
ဘူးသီးတောင်မြို့မာ နိုဗမ်ဘာ ၁၄ ရက်နိညည့်က အပြစ်မဲပြည်သူ ၈ ယောက်ကို စစ်ကောင်စီတပ်ဖွဲ့ဝင်တိ ဝင်ဖမ်းလားကြောင်း သိရပါရေ။
ဖမ်းဆီးခံရရေ လူတိမာ ဘူးသီးတောင်မြို့၊ အမှတ်(၂) ရပ်ကွက်က ရပ်ကွက်အုပ်ချုပ်ရီးမှူးဦးထွန်းအေး(၅၁နှစ်)၊ ဦးမောင်မြစံ(ခ) ကုလားချေ(၄၅နှစ်)၊ အမှတ် ( ၄) ရပ်ကွက်က ဦးမောင်မြသိန်း(ခ)င/ပိန်ချေ(၅၅နှစ်)၊ ဦးဆွေသန်းဦး(၃၅ နှစ်)၊ အမှတ်(၅) ရပ်ကွက်က ဦးဟာမီတူလ္လာ(၄၃ နှစ်)၊ ဦးနော်အာလောင်(၄၃နှစ်)၊ ဦးမောင်လှဝင်း(ခ)ဟူဆောင်းဇူဟာ(၄၁နှစ်) နန့် ဦးမာမတ်ရော်ဟိမ်း(၄၀နှစ်) ရို့ဖြစ်ကတ်ပါရေ။
နိုဗမ်ဘာ ၁၄ ရက်နိညည့် ၉ နာရီ ခွဲလောက်မာ ဘူးသီးတောင်အခြီစိုက် စစ်ကောင်စီတပ် အမှတ်(၁) စစ်ဗျူဟာ အထူးအဖွဲ့နန့် ခမရ(၃၅၂) တပ်ရင်း ပူးပေါင်း အင်အား(၆၀) လောက်စွာ စစ်ကား ၄ စီးနန့် ဘူးသီးတောင်မြို့ထဲသို့ ဝင်ရောက်လာပြီးကေ သူရို့ ၈ ယောက်ကို နီအိမ်တိထဲက ဝင်ဖမ်းလားစွာဖြစ်ပါရေ။
ကုန်ခရေ နိုဗမ်ဘာ ၁၃ ရက်နိကလည်း စစ်ကောင်စီစွာ စစ်တွေ၊ တောင်ကုတ်၊ ကျောက်ဖြူနန့်သံတွဲမြို့နယ်ရို့က စီးပွားရီးလုပ်ငန်းသျှင်တိအပါအဝင် အပြစ်မဲ့ပြည်သူ ၂၂ ယောက်ထက်မနည်းကို မတရား ဖမ်းယူလားခပါသိမ့်ရေ။
ရက္ခိုင့်တပ်တော်နန့်တိုက်ပွဲဖြစ်တိုင်း ရက္ခိုင်က အပြစ်မဲ့ပြည်သူတိကို အကြောင်းအမျိုးမျိုးပြဖမ်းဆီးလိဟိရေ စစ်ကောင်စီစွာ နိုဗမ်ဘာ ၁၃ ရက်နိကစလို့ ရက္ခိုင့်တပ်တော်နန့် တိုက်ပွဲဖြစ်ပွားခပြီးနောက်ပိုင်း အဂုပိုင်ဖမ်းဆီးလားစွာဖြစ်ပြီးကေ လက်ဟိနှစ်ရက်အတွင်း အပြစ်မဲ့ပြည်သူ ၄ဝ ကျော် ဖမ်းဆီးခံထားရကြောင်း စုံစမ်း သိဟိရပါရေ။
