APM၊ ဂျန်နဝါရီ ၁၅ / ၂၀၂၅
အကြမ်းဖက် ဖက်ဆစ် စစ်ကောင်စီကို ဆန့်ကျင်တိုက်ခိုက်နီရေ ပအိုဝ်းအမျိုးသားလွတ်မြောက်ရီးတပ်မတော် (PNLA) ရဲဖော် ၅ ယောက်ကို အကြမ်းဖက် ဖက်ဆစ် စစ်ကောင်စီလက်အောက်ခံ PNO ပအိုဝ်းပြည်သူ့စစ်အဖွဲ့က ဖမ်းဆီး နှိပ်စက် သတ်ဖြတ်ခကြောင်း PNLA က ဒေနိ (ဂျန်နဝါရီ ၁၅ ရက်နိ) မာ ထုတ်ပြန်ပါရေ။
အကြမ်းဖက် ဖက်ဆစ် စစ်ကောင်စီတပ်နန့် PNO ပြည်သူ့စစ်အဖွဲ့ ပူးပေါင်းစစ်ကြောင်းစွာ ကုန်ခရေ ဂျန်နဝါရီ ၁၂ ရက်နိမာ ဆီဆိုင်မြို့နယ်၊ ထီစုံရွာနားကို စစ်ကြောင်းထိုးခရာ PNLA နန့် တိုက်ပွဲပြင်းထန်စွာဖြစ်ပွားခရေလို့ ဆိုပါရေ။
တိုက်ပွဲအတွင်း စစ်ကောင်စီတပ်၏ စစ်ကြောင်းမှူး ၁ ယောက်အပါအဝင် ၂၀ ထက်မနည်းသီဆုံးခပြီးကေ၊ PNLA ဖက်ကလည်း တပ်ဖွဲ့ဝင် ၁ ယောက်သီဆုံးခပနာ ၅ ယောက် ဖမ်းဆီးခံခရရေလို့ ဖော်ပြထားပါရေ။
ယင်းဖမ်းဆီးခံရရေ ရဲဖော် ၅ ယောက်ကို ဂျန်နဝါရီ ၁၃ ရက်နိ၊ မိုးထ ၁၀ နာရီ ၁၅ မိနစ်လောက်မာ PNO ပြည်သူ့စစ်အဖွဲ့က နှိပ်စက်သတ်ဖြတ်ခရေလို့ ဆိုပါရေ။
မသတ်ဖြတ်ခင် ဂျန်နဝါရီ ၁၃ ရက်နိ၊ မိုးထပိုင်းက PNO ပြည်သူ့စစ်အဖွဲ့စွာ ယင်းရဲဖော် ၅ ယောက် အသက်ရှင်ဟိနီရေလို့ ထုတ်ပြန်ခသိမ့်ကြောင်း သိရပါရေ။
ပအိုဝ်းလူမျိုးအချင်းချင်းဖြစ်ကေလေ့ စစ်ကောင်စီလက်အောက်ခံ PNO ပြည်သူ့စစ်အဖွဲ့က စစ်အာဏာသျှင်အလိုကျ ပအိုဝ်းလူမျိုးကို ပြန်လည် သတ်ဖြတ်ခစွာလို့ ဖော်ပြထားပါရေ။
PNLA အနီနန့် စစ်ကောင်စီတပ်နန့် တိုက်ပွဲတိအတွင်း ဖမ်းဆီးရမိရေ စစ်သုံ့ပန်းတိ၊ ပြည်သူ့စစ်တပ်ဖွဲ့ဝင်တိကို နှိပ်စက်သတ်ဖြတ်ခြင်းတိ မပြုလုပ်ဘဲ စစ်သုံ့ပန်းဥပဒေနန့်အညီ ထိန်းသိမ်းထားကေလေ့ PNO ပြည်သူ့စစ်ဘားမာအဖမ်းခံရရေ PNLA ရဲဖော် ၅ ယောက်မာ ရက်စက်စွာ နှိပ်စက်သတ်ဖြတ်ခံခရစွာဖြစ်တေလို့ ဆိုပါရေ။
၂၀၂၂ ခုနှစ်၊ စပ်တမ်ဘာ ၁၄ ရက်နိကလည်း စစ်ကောင်စီလက်အောက်ခံ PNO ပြည်သူ့စစ်အဖွဲ့စွာ ရွာကိုအလည်လားရေ PNLA ရဲဖော် ၅ ယောက်ကို ဖမ်းဆီးသတ်ဖြတ်ခသိမ့်ကြောင်း သိဟိရပါရေ။
Photo – PNLA
