APM ၊ ဂျန်နဝါရီ ၁၅ / ၂၀၂၄
ပလက်ဝမြို့နယ်မာ ဂျန်နဝါရီ ၁၅ ရက်နိ၊ နိခင်း ၂ နာရီ မိနစ် ၃၀ လောက်က စစ်ကောင်စီ၏ ဂျက်ဖိုက်တာ တစီး လာရောက်တိုက်ခိုက်မှုကြောင့် ကျီးလေရွာမာ စစ်ဖီးယှောင်နီရေ အသက် ၅ နှစ်အရွယ်အချေတယောက်အပါအဝင် အပြစ်မဲ့ပြည်သူ ၄ ယောက်သီဆုံးခရပြီးကေ နောက်ထပ်လည်း အသက် ၈ နှစ်အချေတယောက်အပါအဝင် ၃ ယောက် ဒဏ်ရာရလားသိမ့်ကြောင်း သိရပါရေ။
သီဆုံးလားရေ လူတိမာ ပလက်ဝမြို့နယ်၊အထက်မီးလက်ဝရွာက မောင်မြတ်သူအောင်(၅ နှစ်)၊ ပလက်ဝမြို့၊ ပလုတ်တောင်ရပ်ကွက်က ဦးမောင်ကျန် (၄၉နှစ်)၊ ဦးမောင်ဖြူ(၆၇နှစ်) နန့်ဦးဇော်ဇော်လွင် (၃၆ နှစ်) ရို့ဖြစ်ပြီးကေ ဒဏ်ရာရလားရေလူတိကတော့ ပလက်ဝမြို့နယ်၊ မီးလက်ဝရွာက မဆန်းဆန်းနွယ်(၈ နှစ်)၊ ဒေါ် နွယ်နွယ်သန်း(၃၉ နှစ်)နန့် ကို အောင်ဆန်းဘို (၂၂နှစ်) ရို့ဖြစ်ကတ်ပါရေ။
သူရို့တိအားလုံးစွာ ပလက်ဝမြို့နယ်၊ ကျီးလေရွာမာ လာရောက် စစ်ဖီးယှောင်ခိုလှုံနီကတ်စွာ ဖြစ်ပါရေ။
ဒေနိနိခင်း၂ နာရီခွဲလောက်မာ စစ်ကောင်စီတပ်က ဂျက်ဖိုက်တာနန့် ဗုံးကြဲတိုက် ခိုက်ခရေ ဗုံးသီးတလုံးစွာ ယင်းကျီးလေရွာနားမာ ကျရောက်ပေါက်ကွဲခရေလို့ ရွာသားတိက ပြောပါရေ။
ယင်းဗုံးသီးကျရောက်ပေါက်ကွဲမှုကြောင့် မောင်မြတ်သူအောင်၊ ဦးမောင်ကျန်၊ ဦးမောင်ဖြူနန့် ဦးဇော်ဇော်လွင်ရို့မာ နီရာမာပင် ဂွင်ချင်းသီဆုံးလားရရေလို့ ဆိုပါရေ။
ယင်းအပြင် မဆန်းဆန်းနွယ်၏ ညာဖက်ခါး၊ ဒေါ် နွယ်နွယ်သန်း၏ လက်နှစ်ဖတ်လုံးနန့် ကိုအောင်ဆန်းဘို၏ ရင်ဖက်ရို့မာလည်း ဗုံးစကျပြီးကေ ဒဏ်ရာ ပြင်းပြင်းထန်ထန် ရလားခရေလို့ သိဟိရပါရေ။
