APM ၊ မေ ၁၄ / ၂၀၂၄
အကြမ်းဖက်စစ်ကောင်စီက စစ်မှုထမ်းဖို့အတွက် ဖိအားပီးခေါ်ယူခံနီရလို့ပြောဆိုထားရေ အကြမ်းဖက် မူဆလင်တိစွာ လက်တွိမာတော့ အာရက္ခပြည်သူရို့၏ နီအိမ်တိ၊ ရပ်ရွာတိကို လိုလိုလားလား အားရပါးရမီးတိုက်ဖျက်ဆီးနီကတ်ပါရေ။
အကြမ်းဖက်စစ်ကောင်စီနန့်ပူးပေါင်းပြီးကေ မူဆလင်လက်နက်ကိုင်တိစွာ အာရက္ခပြည်သူရို့၏ နီအိမ်တိကို ဓာတ်ဆီလောင်းမီးတိုက်နီရေ ရုပ်သံဖိုင်တခု မေ ၁၃ ရက်နိက MR Rohingya Military ဆိုရေ Facebook pageနန့် Youtube ချန်နယ်ရို့မာ တက်လာစွာကို တွိရပါရေ။
ယင်းရုပ်သံဖိုင်စွာ မောင်တောမြို့နယ် ရွှီရင်အေးရွာကို မီးတိုက်ဖျက်ဆီးရေခါ ရိုက်ယူထားရေ ရုပ်သံဖိုင်ဖြစ်ပြီးကေ အကြမ်းဖက်စစ်ကောင်စီလက်အောက်ခံ မူဆလင်တိက အာရက္ခပြည်သူရို့၏ နီအိမ်တိကို ပျော်ပျော်ပါးပါး အားပါးတရ ဓာတ်ဆီလောင်း မီးတိုက်ဖျက်ဆီးနီစွာကတ်စွာဖြစ်ပါရေ။
ယင်းရုပ်သံဖိုင်မာ မူဆလင်တိပြောဆိုရေ စကားအဓိပ္ပာယ်က ကြည့်ထားကတ် ညီအကိုတိ ငါရို့တိကို လုပ်ထားရေ ရခိုင်အိမ်တိကို ငါရို့ ပြန်မီးတိုက်နီရဗျာယ်၊ ရခိုင်တိကို ငါရို့ အေပိုင်နန့် အနိုင်ယူပြမယ်” ဆိုပြီးကေ မူဆလင်ဘာသာနန့် ကြွီးကြော်ပြောဆိုထားစွာ ဖြစ်ထားပါရေ။
မူဆလင်တိကို အကြမ်းဖက်စစ်ကောင်စီက စစ်မှုထမ်းဖို့ အတင်းခေါ်ခံရစွာလို့ မူဆလင်တက်ကြွလှုပ်ယှားသူတိက ပြောဆိုနီကေလေ့ ရုပ်သံဖိုင်အရ မူဆလင်တိက အာရက္ခပြည်သူရို့၏ နီအိမ်တိကို မီးတိုက်နီစွာရေ အာရက္ခပြည်သူရို့ကို တုံ့ပြန်တိုက်ခိုက်ချင်ရေ အခြေအနီကို တွိရရေလို့ မောင်တောဒေသခံတယောက်က ဆိုပါရေ။
အကြမ်းဖက်စစ်ကောင်စီက မူဆလင်တိကို စစ်မှုထမ်းဖို့ ခေါ်ယူစွာမဟိလို့ ဖင်ပိတ်ငြင်းဆိုနီကေလေ့ အကြမ်းဖက်စစ်ကောင်စီက စစ်သင်တန်းပီး လက်နက်တပ်ဆင်ထားရေ မူဆလင်တိ၏ ရုပ်သံဖိုင်၊ဓာတ်ပုံတိစွာ အိန်တာနက်စာမျက်နှာတိမာ ဆက်တိုက်ထွက်ပေါ်လာနီပါရေ။
မေ ၁၃ ရက်နိက ထွက်ပေါ်လာရေ မောင်တော ရွှီရင်အေးဖြစ်စဉ်မတိုင်ခင်ကလည်း အကြမ်းဖက်စစ်ကောင်စီက လက်နက်တပ်ဆင်ထားရေ မူဆလင်တပ်ဖွဲ့ဝင်တိစွာ မောင်တောမြို့ လမ်းမထက်တိမာ လက်နက်အပြည့်အစုံနန့်လားလာနီရေ ရုပ်သံဖိုင်တချို့၊မူဆလင်တပ်ဖွဲ့ဝင်တိကို အကြမ်းဖက်စစ်ကောင်စီက စစ်သင်တန်းပီးနီရေရုပ်သံဖိုင်တိ၊ ပုံတိ အများအပြားပေါ်ထွက်ခပါရေ။
Ref: DVN
