
APM ၊ ဖေဖော်ဝါရီ ၁၄ / ၂၀၂၃
ရသေ့တောင်မြို့နယ်၊ ပြားချောင်းကြီးစစ်ဖီးယှောင်စခန်းတွင် စားနပ်ရိက္ခာ၊ ဆီးဝါးနန့်အခြီခံလူသုံးကုန်ပစ္စည်းများ အရေးပေါ်လိုအပ်နီကြောင်း သိဟိရသည်။
ယင်းစစ်ဖီးယှောင်စခန်း၌ အိမ်ထောင်စု ၅၅ စု ခိုလှုံလျက်ဟိပြီး လက်ဟိတွင်စားနပ်ရိက္ခာ များပြတ်လပ်နီကတ်ကြောင်း စစ်ဖီးယှောင်များက ပြောသည်။
ယင်းအပြင် ကျန်းမာရီးစောင့်ယှောက်မှုနန့် တခြားလူမှုရီး စောင့်ယှောက်မှုအကူအညီများ အရေးပေါ်လိုအပ် နိသည့်အပြင် ဆောင်းတွင်းကာလဖြစ်၍ စစ်ဖီးယှောင်များမှာ ပုဆိုးနန့် အနွီးထည်များလေ့ လိုအပ်လျက်ဟိ ကြောင်းသိရသည်။
ယင်းစစ်ဖီးယှောင်စခန်းဟိ ယာယီနီအိမ်အဆောင်များမှာလေ့ အမိုးအကာများ ပြိုကျပျက်စီးနီ၍ ပြန်၍ပြုပြင် ရန်လေ့ အကူအညီများ လိုအပ်နီကြောင်း စစ်ဖီးယှောင်များက ဆိုသည်။
ပြားချောင်းကြီး စစ်ဖီးယှောင်စခန်းဟိ စစ်ဖီးယှောင်များမှာ ကုန်ခသည့် ၂၀၁၈ ခုနှစ်ကပင် နီရပ်စွန့်ခွာ ထွက်ဗြီးတိမ်းယှောင်လာကတ်သူများဖြစ်ပြီး လက်ဟိတွင်လေ့ ရပ်ရွာအနီးအနား၌ မြန်မာစစ်တပ် တပ်စွဲထား၍နီရပ်မပြန်နိုင်သိမ့်ဘဲစစ်ဖီးယှောင်စခန်းတွင်ခိုလှုံ နီထိုင်ကတ်ရဆဲဖြစ်ကြောင်း သိဟိရသည်။
