APM ၊ နိုဗမ်ဘာ ၁၄ / ၂၀၂၃
မင်းပြားမြို့ထဲမာ နိုဗမ်ဘာ ၁၃ ရက်နိ ညည့်က စစ်ကောင်စီတပ်ဖွဲ့ဝင်တချို့ သီနတ်တိနန့် ယမ်းသန်းပစ်ခတ်မှုကြောင့် မြီးအဘောင်မနှစ်ယောက် ဒဏ်ရာရခကြောင်းသိရပါရေ။
ဒဏ်ရာရလားရေလူတိမာ မင်းပြားမြို့၊ ဥက္ကာပျံရပ်ကွက်က အသက် ၇၀ အရွယ် ဒေါ်ရွှီနု နန့် မြီးဖြစ်သူ ၁၃ နှစ်အရွယ် မဝင်းဝင်းလှိုင် ရို့ဖြစ်ကတ်ပါရေ။
နိုဗမ်ဘာ ၁၃ ရက်နိ ညည့် ၁၀ နာရီကျော်လောက်က ရာမာဖက်ကလာရေ စစ်ကောင်စီ စစ်ကားနှစ်စီးစွာ မင်းပြားနရမ်းခွဆုံအရောက်ကစလို့ မင်းပြားမြို့ထဲတလျှောက် လက်နက်ချေတိနန့် တရစပ် ယမ်းသန်းပစ်ခတ်ခကတ်ပါရေ။
ယင်းပစ်ခတ်မှုကြောင့် ဒေါ်ရွှီနု၏ ဘယ်ဖက်လက်မောင်း၊ ညာဖက်ပါး၊ ခါးမာ ကျည်စကျ လို့ ဒဏ်ရာတိ ပြင်းပြင်းထန်ထန်ရလားပနာ မြီးဖြစ်သူမာလည်း ခန္ဓာကိုယ်အနှံ့ ဒဏ်ရာချေတိရလားပါရေ။
ယင်းပိုင်ကျည်ဆံထိမှန်ခပြီးနောက် မင်းပြားဆီးရုံကြီးကို အရေးပေါ်ပို့ဆောင်ဖို့ဆိုကေလေ့ ယင်းအချိန်မာ စစ်ကောင်စီတပ်သားတိက မြို့အနှံ့ သီနတ်တိနန့် ယမ်းပစ်နီလို့ မလားဝံ့ဘဲ မိုးလင်းမှရာယင်းမြီးဘောင်မနှစ်ယောက်ကို မင်းပြားဆီးရုံကြီးကို အရေးပေါ်ပို့ဆောင် ဆီးကုသမှုခံယူနီရကြောင်း သိရပါရေ။
နိုဗမ်ဘာ ၁၃ ရက်နိမိုးထကလည်း စစ်ကောင်စီတပ်၏ လက်နက်ကြီးယမ်းသန်းပစ်ခတ်မှုကြောင့် မင်းပြားမြို့နယ်၊ ဖေသာပြင်ရွာက ရွာသားတယောက် ပြင်းပြင်းထန်ထန် ဒဏ်ရာရခသိမ့်ပါရေ။
