APM၊ ဒီဇမ်ဘာ ၁၃/ ၂၀၂၂
ဩစတြေးလျနိုင်ငံ၏ ဒုတိယအကြီးဆုံး နန့် တတိယမြောက် လူဦးရေအများဆုံး ပြည်နယ်တခုဖြစ်သည့် ကွင်း စလန်း ပြည်နယ်တွင် ဒီဇမ်ဘာ ၁၂ရက်နိက သီနတ်ပစ်ခတ်မှုတခုဖြစ်ပွားခပြီး၊ ရဲအရာဟိ ၂ ဦးအပါအဝင် လူ ၆ ဦး သီဆုံးလားခကြောင်း အာဏာပိုင်များက ပြောကြားသည်။
ဒီဇမ်ဘာ ၁၂ ရက်နိ ဒေသစံတော်ချိန် ညဇာ ၄ နာရီ ၃၀ မိနစ်ခန့်၌ ကွင်းစလန်းပြည်နယ်၏ မြို့တော် ဘရစ္စဘိန်းဟိ နီအိမ်တလုံးအား ရဲတပ်ဖွဲ့ဝင် ၄ ဦးကစုံစမ်းရှာဖွီနီချိန် သီနတ်သမား ၂ ဦးက ရဲတပ်ဖွဲ့ကိုစတင်ပစ်ခတ်ခပြီး၊ ပစ်ခတ် မှုဖြစ်စဉ်အတွင်း ရဲအရာဟိ Matthew Arnold (၂၆ နှစ်) နန့် Rachel McCrow (၂၉ နှစ်) ရို့ သီဆုံးလားခကြောင်း ကွင်းစလန်း ရဲတပ်ဖွဲ့က ဆိုသည်။
အဆိုပါ ပစ်ခတ်မှုဖြစ်စဉ်အတွင်း ရဲအရာဟိနှစ်ဦးအပြင် ၄၅နှစ်အရွယ် အမျိုးသမီး ၁ ဦး၊ ၄၆ နှစ်နန့် ၄၇ နှစ်အရွယ် အမျိုးသား ၂ဦးနန့်တခြား ၅၈နှစ်အရွယ်အိမ်နီးချင်း ၁ ဦး သီဆုံးခပြီး၊ နောက်ထပ် ရဲအရာဟိ၂ ဦးလေ့ထိခိုက်ဒဏ်ရာ ရလားခသည်။
ဩစတြေးလျနိုင်ငံ၊ Tasmania ပြည်နယ်တွင်လေ့ လွန်ခသည့် ၁၉၉၆ ခုနှစ် ဧပြီလက သီနတ်သမားတဦး၏ ပစ် ခတ်မှုကြောင့် လူ ၂၅ ဦးထက်မနည်း သီဆုံးခကာ၊ နိုင်ငံ၏လက်နက်ဥပဒေကို တင်းတင်းကျပ်ကျပ်ပြောင်း လဲခပြီး နောက်ပိုင်း အဂုပိုင် သီနတ်ပစ်ခတ်မှု ထပ်မံဖြစ်ပွားလာခြင်း ဖြစ်သည်။
