APM ၊ ဂျူလိုင် ၁၃ / ၂၀၂၃
ပလက်ဝမြို့နယ်တွင် ဒေရက်ပိုင်းအတွင်း ဆန်အပါအဝင်စားသောက် ကုန်ဈီးနှုန်များ အဆမတန် မြင့်တက်နီကြောင်း သိရသည်။
ပလက်ဝမြို့နယ်တွင် ဒေနှစ်အစပိုင်းက ဆန်တအိတ်ကို ၈၀၀၀၀ ကျပ်နန့် စားဆီ တလီတာကို ၁၅၀၀ ကျပ်လောက်ရာ ဟိခ ကေလေ့ လက်ဟိ ဆန်တအိတ်ကို တသိန်းခွဲ နီးပါးနန့် စားဆီ တလီတာကို ငွေကျပ် ၈၀၀၀ အထိ ဈီးကြီးပီး ဝယ်နီ ကတ်ရ သည်ဟု ဒေသခံများက ပြောသည်။
ယင်းအပြင် ငရုတ်သီးစိမ်း တပိဿာကို ၆၀၀၀ ကျပ်နန့် တခြားစားသောက်ကုန်ဈီးနှုန်းများလေ့ အဆမတန် မြင့်တက်နီပြီး စက်သုံးဆီစသည့် တခြား လူသုံးကုန်ပစ္စည်းများမှာလေ့ ဈီးနှုန်း တစစ မြင့်တက်လာနီသည်ဟုဆိုသည်။
ယင်းသို့ ဈီးနှုန်းများ မြင့်တက်လာခြင်းမှာ ပလက်ဝသို့ ကုန်စည်စီးဆင်းရာ အဓိကလမ်းကြောင်းဖြစ်သည့် ပလက်ဝ-ကျောက်တော် ရီလမ်းကြောင်း၌ စစ်ကောင်စီ ဇက်ရီယာဉ်တခုတည်းရာဗြီးဆွဲခွင့်ရသည့်အပြင် ကုန်ပစ္စည်းများ သယ်ယူ ခွင့်ကိုလေ့ မြန်မာစစ်တပ်က ကန့်သတ်ထားခြင်းကြောင့်ဟု ပြောဆိုကတ်သည်။
ပလက်ဝမြို့နယ်အတွက် လိုအပ်သည့် အခြီခံ စာသောက်ကုန်နန့် လူသုံးကုန်ပစ္စည်းများကို ကျောက်တော်-ပလက်ဝ ရီလမ်း ကြောင်းမှတဆင့် ကုလားတန်မြစ်ကြောင်းအတိုင်း အဓိက သယ်ယူနီရခြင်းဖြစ်ပြီး၊ မြန်မာစ်တပ်က အဂုပိုင် ကန့်သတ်ထား မှုကြောင့် မြို့နယ်အတွင်း ကုန်စည်စီးဆင်းမှုများလေ့နှောင့်နှေးနီကာ ဒေသခံ လက်လုပ်လက်စားများမှာ အခက်အခဲများဖြင့် ရင်ဆိုင်နီကတ်ရကြောင်း သိဟိရသည်။
