APM၊ ဂျုန် ၁၃/ ၂၀၂၄
ဒေနိ(ဂျုန် ၁၃ ရက်နိ) မိုးထ ၉ နာရီအချိန် စစ်ကောင်စီတပ်က လက်နက်ကြီးနန့်ပစ်ခတ်မှုကြောင့် မောင်တောမြို့နယ်၊ ဗောဓိကုန်းရွာက ရွာသားနှစ်ယောက် ဒဏ်ရာ ပြင်းပြင်းထန်ထန် ရလားရေလို့ သိရပါရေ။
ဒဏ်ရာရလားရေတိလူစွာ ကိုရဲထွန်းလင်း (၂၀နှစ်) နန့် ကိုနေဝင်းသန်း (၂၀ နှစ်)ရို့ဖြစ်ကတ်ပါရေ။
ဒေနိ မိုးထ ၉ နာရီခွဲလောက်မာ မောင်တောမြို့၊ မြို့သူကြီးအခြီစိုက် စစ်ကောင်စီ၏ နခခ (၅) တပ်ရင်းက ဗောဓိကုန်းရွာဖက်သို့ လက်နက်ကြီး (၃) လုံး အတွဲလိုက် ပစ်ခတ်ခရေလို့ ရွာသားတိက ပြောပါရေ။
ယင်းလက်နက်ကြီးကျည်တိစွာ ဗောဓိကုန်းရွာတောင်ဖက် တောစပ်အနားသို့ ကျရောက်ပေါက်ကွဲခပြီးကေ ယင်းအနားမာ ထင်းရှာနီကတ်တေ ကိုရဲလင်းထွန်း၏ ညာဖက်လက်မောင်း၊ နဖူးနန့် ကိုနေဝင်းသန်း၏ နောက်ကုန်းရို့မာ ဒဏ်ရာပြင်းပြင်းထန်ထန်ရလားရေလို့ ဆိုပါရေ။
အာရက္ခဒေသအတွင်း စစ်ရီးအထိနာနီလို့ ယှုံးမဲမဲပနာ မိုက်ရူးရဲဆန်နီရေ ဖက်ဆစ်စစ်ကောင်စီစွာ အာရက္ခတပ်တော်ထိန်းချုပ်ထားရာ မြို့ ၊ ရပ်ရွာတိနန့် အရပ်သားပြည်သူရို့ လားလာလှုပ်ယှားရာ နီရာတိကို ပစ်မှတ်ထားလို့ ရီကြောင်း၊ လက်နက်ကြီး၊ လီကြောင်းပစ်ခတ်တိုက်ခိုက်မှုတိတရက်ထက်တရက် ပိုလုပ်လာနီပါရေ။
