APM၊ မာ့ချ် ၁၃/ ၂၀၂၅
ကျောက်ဖြူမြို့နယ်၊ ကြတ္တိန်ရွာကို ဒေနိ(မာ့ချ် ၁၃ ရက်နိ)၊ နိခင်း ၁ နာရီခွဲလောက်မာလည်း အကြမ်းဖက် ဖက်ဆစ် စစ်ကောင်စီက ဒရုန်းနန့် ထပ်မံ ဗုံးကြဲတိုက်ခိုက်လို့ အပြစ်မဲ့ပြည်သူ တယောက် သီဆုံးလားပြီးကေ၊ တယောက် ဒဏ်ရာရလားပနာ နီအိမ် ၁၀ ထက်မနည်း မီးလောင် ပျက်စီးလားရေလို့ ဒေသခံတိက ပြောပါရေ။
သီဆုံးလားရေလူစွာ ကြတ္တိန်ရွာက ဦးပေါက်စ (၆၁ နှစ်) ဖြစ်ပါရေ။
ဒေနိ၊ နိခင်း ၁ နာရီလောက်မာ အကြမ်းဖက် ဖက်ဆစ် စစ်ကောင်စီ၏ ဓညဝတီရီတပ်စခန်းဌာနချုပ်ကနီ ကြတ္တိန်ရွာကို ဒရုန်းတိနန့် ဒရော့ဗုံး ၆ လုံးကြဲချတိုက်ခိုက်ခရေလို့ ဒေသခံတယောက်က Arakan Princess Media ကို ပြောပါရေ။
ဗုံးကြဲတိုက်ခိုက်မှုအပြီး ကြတ္တိန်ရွာဟိ နီအိမ်တချို့ မီးလောင်နီစွာကို ဦးပေါက်စအပါအဝင် ရွာသားတချို့ မီးဝင်သတ်နီချိန် နိခင်း ၁ နာရီ ၄၅ မိနစ်လောက်မာ အကြမ်းဖက် ဖက်ဆစ် စစ်ကောင်စီက ဒရုန်းတစီးနန့် ဗုံးတလုံး ထပ်မံ ကြဲချ တိုက်ခိုက်ခရေလို့ ဆိုပါရေ။
ယင်းဗုံးကြဲတိုက်ခိုက်မှုကြောင့် ဦးပေါက်စမာ နီရာမာပင် ဂွင်ချင်းသီဆုံးလားပြီးကေ နောက်ထပ် အပြစ်မဲ့အရပ်သားပြည်သူ တယောက်လည်း ထိခိုက်ဒဏ်ရာရလားပနာ အရေးပေါ် ဆီးကုသမှု ခံယူနီရပါရေ။
ယင်းအပြင် ရွာဟိ နီအိမ် ၁၀ ထက်မနည်းလည်း မီးလောင်ပျက်စီးလားရေလို့ သိရပါရေ။
Photo- Arakan Princess Media
